Khawzawl, 31st January 2023: Khawzawl District Research Office buatsaihin vawiin khan Khawzawl DC Conference Hall-ah Khawzawl District chhunga Registrar of Births and Deaths te tan Training buatsaih a ni a. He hun hi Khawzawl Bawrhsap Pu K. Lalrohlua chuan khuallian niin a hmanpui.

Khuallian Pu K. Lalrohlua chuan thu sawiin Khawzawl District Registrar of Births and Deaths te tana training buatsaih theih a ni chu lawmawm a tih thu a sawi a. Mahni hna leh tih tur theuh thahnemngai taka thawh hi khua leh tui tha nihna a ni, a ti. Khaw tina nau piang leh mitthi tha taka chhinchhiah chu ram rawngbawlna pawimawh tak, ram dinhmun tarlanna leh ram hmabak lanna a ni tiin rinawmna leh dikna vawng chunga an hna te thawk zel turin kalkhawmte chu a chah a ni.

Khawzawl Bawrhsap Pu K. Lalrohlua chuan Registrar of Births and Deaths kalkhawmte chu record felfai tak leh uluk taka vawn him ngaipawimawh turin a chah a, document soft copy a vawn that ching tur leh he mi kawnga mipuite zirtirtu ni theuh turin a ngen bawk a ni.

He hunah hian Khawzawl District chhunga kum 39 chhung (July ni 1, 1985 atanga vawiin thleng ) Registrar of Births and Deaths mawhphurhna chelhtu Pu H. Vanlalngaia, Tualpui RBD Unit leh Pu Kamkhawchina, Ngaizawl RBD Unit te hnenah chawimawina thuziak khuallian hian a hlan nghal a ni.

Inkhawm hi Pu Lalthlamuana Fanai, District Research Officer  chuan kaihruaiin kalkhawmte lawmna thu a sawi a. Pu J. Ramdinmawia, Additional District Registrar (ADR) chuan Registrar of Births and Death kalkhawmte hi zirtirna a pe a. Khawzawl District chhungah hian RBD 38 an awm a, vawiin training-ah hian mi 37 an tel thei a ni.