Ni 7 October 2024 chawhma dar 11:30 am khan DC Auditorium-ah Mizoram State Disaster Management Authority (SDMA) leh Khawzawl District Disaster Management Authority (DDMA) tangkawpin Quick Response Team (QRT) member leh State Disaster Response Force (SDRF) hnuaia 2nd IR Battalion, Khawzawl te tana training buatsaih hawnna hun (inaugural function) neih a ni a, Khawzawl Deputy Commissioner, Pu K. Vanlalthiana'n a thu sawiin he hun hi a hawng a ni.

He hun hi Er. Lalbiakzuala, Assistant Director, Disaster Management & Rehabilation chuan a kaihruai a, Pu Zothansanga Hmar, District Organizer, DM&R chuan training kalhmang chungchang thu tawi a sawi bawk. DC Pu K. Vanlalthiana chuan he hun pawimawh tak hlawhtlin theih nana thawktute chungah lawmthu a sawi a, QRT member te training pawimawh tak a ni tih hre renga ngaithla thaa, zir thaa, zawhna zawt hreh lo turin a chah a. District thlamuanna leh himna vawng himtu ni ngei turin duhsakna sang ber a hlan bawk a ni. Hemi zawh hian SDO (Sadar), Pu Suvigya S. Chandra chuan lawmthu sawina hun (vote of thanks) a nei bawk a ni.

He training hi ni 5 (7th-11th October) awh tura duan a ni a, training kaihruai tur te chu DM&R atanga hotute lo kal bakah hian Pu Moses Lalthanpuia, State Adventure Organizer, Department of Sports & Youth Services, Pu Lalhlimpuia, Guest Instructor leh Pu Lalmuanawma, Guest Instructor te an ni. QRT member te hian chhiat rupna a thlen huna chhanchhuah ngai leh tanpui ngai te tanpui dan tur te leh thil dang thiam ngai leh hriat tur chi hrang hrang an zir dawn a ni