Khawzawl, the 11th December, 2021: 

Art & Culture Department leh Sub-Headquarters YMA, Khawzawl tangkawp bultumin vawiin khan Khawzawl Zuchhip Branch YMA Hall-ah Pawl Kut lawmna neih a ni a, Pawl Kut lawmna Programme hi Khawzawl District Bawrhsap Pu C.C. Lalchhuangkima chuan a hawng a ni.


Pawl Kut lawmna hi a tirah chuan Khawzawl Field No.1 a neih turin ruahman a ni a, amaherawhchu Khawzawl khawpui chhungah COVID-19 Positive an pun chhoh zel avang leh Positive zingah naupang an tam avangin mipui nawlpui nena Kut lawmna neih tum chu thulh a ni. Kut a Items chi hrang hrang nei tur, Khawzawl khawpui chhunga YMA Branch 10 atanga YMA Chhangte bakah Ngaizawl Cultural Club leh Chawngtlai Cultural Club te chu an item neih turte Video Camera hmanga Cover in, hengte hi Khawzawl khawpui chhunga Local Cable pahnij - L.R. Vision leh VLS Vision-ah te tihchhuah a ni dawn a ni.

Vawiina Pawl Kut lawmna Programme hawnnaah hian District Bawrhsap Pu C.C. Lalchhuangkima chuan thu sawiin, Pawl Kut chu kan pi leh pute hunlai atanga naupangte pual bik a nih avangin Pawl Kut lawmna hi a hlimawmin a nuam bik a, hripui leng avanga ruahman ang leh beisei anga hman theih a ni ta lo chu pawi a tih thu a sawi a. COVID-19 len vanga hun rei tak kan inkharkhip chhung khan nunphung pangngaiin a tuar nasa lutuk a, tunhma anga inkharkhip leh tur chuan riltam a awm emaw naupangte hmalam hun chhe vek khawp inkhung an awm a ngai dawn a. Hei bakah hian hripui lentirh a awm lo Vaccine te a lo awm tawh bawk nen, tunhmaa Lockdown leh Restricted Area tih angte kha tunah chuan kalpui a rem tawh lo a ni a ti. 


District Bawrhsap chuan Pawl Kut hman chuan keimahni a Zo nun ze mawi min rawn phawrh chhuah sak leh se la, keimahni kan inhmangaihna te, keimahni leh keimahni kan inunauna te hi rawn siam tha se la, min tipumkhat leh se a duh tih a sawi a ni.

Pawl Kut lawmna Programme hi SYMA Vice-President Pu Liankunga'n kaihruaiin General Secretary Pu J.H. Vanlaltluanga'n Report a pe a. Finance Secretary Pu Lalnunenga'n lawmthu sawina neiin Pawl Kut lawmna Programme hi a khar a ni. Pawl Kut lawmna Programme-ah hian Zuchhip Branch YMA hnuaia YMA Chhang leh Khawzawl Dinthar Branch YMA hnuaia YMA Chhang ten hnam lam entirin, Programme hman zawhah Khawzawl khawpui chhunga veng hrang hranga YMA Chhangte'n Items an neih te chu a hmunah kalchilhin Video in thla laksak an ni bawk.


Written by H. Lalramenga, SDC, Khawzawl District