Khawzawl district chhunga Primary Agriculture Credit Cooperative Societies (PACS) thawktute tana Mizoram Cooperative Apex Bank Ltd. buatsaih "Training on Basic Banking, Accounting & Computer Skills", September ni 4-6 chhunga hman tur chu Ni 04.09.2024 dar 10:30 am atang khan DC Office Meeting Hall, Khawzawlah tan a ni a, hawnna hun hi Pu Lalchhuanawma, Branch Manager, Khawzawl Branch, MCAB chuan a hmang.
He hunah hian Pu Lalchhuanawma chuan training pawimawh tak an buatsaih thei hi a lawmawm a tih thu a sawi a, training tura lo kal zawng zawng te hlawk taka hun hmanga zir chhuah tha tak nei turin a fuih bawk a ni.
Training atana resource person te chu Pu H. Remsangpuia, Pi Immanuel Lalpianfeli leh Pu F. Lalhluzuala te an ni a, ni 3 chhung hian accounting system chungchang te, cash book leh voucher entry enkawl dan te, financial statement siam dan te leh banking chungchang dang te an zirtir dawn a ni.
Primary Agriculture Credit Cooperative Society, PACS kan tih mai hi Registrar of Cooperative Societies hnuaia registered societies niin, khawtlang hmasawnna thlen thei tur hmalakna hrang hrang (non-credit business activities) an khawih theih bakah, Bank anga credit business (Deposit lak leh Loan pekte) ti ve thei tura thuam niin, Mizoram-ah mumal taka kal 64 an awm tawh a ni. Heng PACS 64 atanga 25 te chu Ministry of Cooperation hmalaknaa Computerised tawh niin, anni hian computer software hmangin Accounting an vawng tawh a ni.
