Ni 3.12.2024 chhun dar 12:00 p.m khan Khawzawl District Hospital Meeting Hall-ah Mizoram State Aids Control Society (MSACS) leh District AIDS Prevention and Control Committee (DAPCC) buatsaihin World AIDS Day pualin hun hman a ni a, Khawzawl DC leh DAPCC Chairman ni bawk, Pu K. Vanlalthiana chu khuallian a ni. World AIDS Day thupui hi "Take the Rights Path: My Health, My Right" tih a ni.

Khuallian Pu K. Vanlalthiana chuan HIV/AIDS laka invenghim turin kawng dik zawh a tul thu a sawi a, ngaihtuahna thianghlim neiin fihlim tum zel turin kalkhawmte a fuih a. Chutih rual chuan HIV/AIDS veite laka endawngna leh hmuhsitna la awm zel hi pawi a tih thu a sawi a, HIV/AIDS vei tih hriat avanga en hrang lovin hmangaihna leh khawngaihna nena dawngsawng zawk turin kalkhawmte a fuih a, thisen test hi a pawimawh tih sawiin in test hreh lo turin a chah bawk a ni.

He hun hi OST Centre a Counsellor, Pi Lalrinpuii Sailo chuan a kaihruai a, Sr. Medical Officer leh DAPCC Member Secretary ni bawk, Dr. Albert Lalhminghlua chuan welcome address a pe a, Mizorama HIV natna dinhmun te sawiin thupui anga HIV/AIDS veite tana dikna chanvo pawimawh zia te a sawi. Medical Officer (AYUSH), Dr. Lalnunpuii Renthlei chuan HIV Act, 2017 chungchang sawifiah nan PowerPoint Presentation a pe a, HIV leh AIDS awmzia te, HIV Act thil tum te, HIV/AIDS vei te'n dikna chanvo an neih te, endawngna leh enhranna he danin a khap thu te, tam thei ang berin an hriat nana duan IEC plan chungchang te leh AIDS chungchang thil pawimawh hrang hrang a sawi a ni. Sr. Medical Officer, Dr. Zozikpuii'n lawmthu sawina hun hmangin he hun hi a khar a ni.

He hunah hian Khawzawl Superintendent of Police (SP), Pu F. Lalbiakzauva, DAPCC member ni bawk a tel a, DAPCC member dangte, hospital thawktute leh Cod Nerc a thawkte an tel bawk a ni