Khawzawl, the 8th August, 2022: Mizoram State Child Protection Society, Aizawl leh District Legal Services Authority, Champhaite tangkawp buatsaih, Khawzawl District chhunga naupangte dikna leh chanvo humhalhna kawnga thawktu hrang hrang; Child Welfare Committee (CWC), Juvenile Justice Board (JJB), State Juvenile Police Unite (SJPU) leh Police-te puala Capacity Building Programme & Training, District Child Protection Unit Office, Khawzawla buatsaih chu vawiin khan District Bawrhsap Pu C.C. Lalchhuangkima chuan khuallian niin a telpui. 

Training Pi Lalsiammawii, DCPO Khawzawl  kaihhruaiah hian khuallian Pu C.C. Lalchhuangkima chuan thu sawiin, Khawzawl District chu District ding thar a nih angin hmasawnna tur kan la ngah hle a ni, a ti a. DCPO Office mumal taka a ding ta chu lawmawm a tih thu sawiin, hei hian Khawzawl District chhunga naupang buaipui ngai leh an chunga pawikhawihna thleng thinte buaipui kawngah nasa takin a pui dawn a ni, a ti a. Naupangte dikna leh chanvo rahbeh saka an chunga pawikhawihna a thleng thin chu pawi a tih thu sawiin, hemi kawngah hian inzirtirna nasa lehzuala kalpui a tul takzet a ni, a ti a. Naupangte dikna leh chanvo humhalh kawnga inzirtirna hun tha tak Khawzawla buatsaih a ni chu lawmawm a tih thu sawiin, hmasawn theihna turin NGO te nen inpawhtlang taka thawhho a ngaih thu a sawi bawk. 

He hunah hian Pi Sylvie Zomuanpuii Ralte, Additional District & Sessions Judge, District Court Champhaiin CWC, JJB leh SJPU te hriattur pawimawh hrang hrangte a sawifiah a. He mi hnu hian kalkhawmte chu Pu V.L. Chama Hnamte, Social Activist, Champhai leh Pi Jothansangi Tlau, Judicial Magistrate, First Class, District Court Champhai ten training ngaihnawm leh bengvarthlak tak an pe bawk a ni.