Khawzawl, the 25th January, 2021

Khawzawl 25th. January, 2021: National Voters Day pual a vawiin chawhma dar 11:00 a Khawzawl Zuchhip YMA Hall a hun hmanah Khuallian Pu Zothanmawia, Khawzawl District Bawrhsap, District Election Officer ni bawk chuan Vote nei thar mi 10 hnenah EPIC leh Badge a sem chhuak a, Pu David Zohmangaiha, Chawngtlai-II BLO hnenah Best BLO Award a hlan bawk.



 

Khawzawl SDC/Election Officer Pu H. Lalramenga kaihhruaia hun hmanah hian Khawzawl District Election Officer Pu Zothanmawia chuan thusawiin, mi lian leh te, hausa leh hausa lo te pawh kan intluktlan vek na chu kan vote hlut zawngah a ni a ti a. Covid-19 hrileng laka kan himna tura sawrkar thuchhuahte fimkhur taka zawm chungin, inthlan chungchanga voter te chanvo, mawhphurhna leh hriat tur pawimawhte hrechiang a, 'Informed voter' ni thei tura tan la theuh tur leh, Election kaihhnawih dan bawhchhiatna an hmuh leh hriatte chu thuneitute hnena thlen zel turin Khawzawl District mipuite a sawm a ni. ECI siam Mobile Application heng - Voter Helpline, cVIGIL, PwD etc. te tangkai taka hmangin, chu chuan mahni thutlukna ngei hmanga vote thlak thei, kan mamawh leh ngaihpawimawh zawngte sawrkar hriata phochhuak thei 'Empowered Voter' ni turin min pui thei dawn a ni a ti.

 

Vawiina National Voters’ Day hmanna-ah hian Pu James Lalnithanga, SDO(S), 22-Tuichang (ST) Assembly Constituency ERO ni bawk chuan NVD Pledge (Thutiam) sawirualna hun a kaihruai a. Dr. Saithangpuia, BDO/AERO in Chief Election Commissioner thuchah Mizotawnga lehlin a chhiarchhuak bawk a ni. 

 

Pu H. Lalramenga, SDC/Election Officer in online a Voter ID download theihna ‘e-EPIC’ chungchang presentation pein, voter te hriatna tizau tura duan Systematic Voters’ Education and Electoral Participation program (SVEEP) chu Khawzawl District-ah uar zawka kalpui tum a nih thu leh, School leh College te kal pangngaia an kal theih hunah Electoral Literacy Club te pawh din tum a nih thu a sawi.  

 

Zuchhip YMA Hall-a National Voters’ Day lawmna hunah hian Khawzawl town chhunga BLO te bakah voter thar thlanchhuah te, Village Council, Political Party leh NGO aiawhte bakah Khawzawl MJA member te an tel. 

 

National Voters’ Day-ah hian Khawzawl District chhunga BLO ten an bialchhungah theuh voter tharte hnena EPIC semchhuah leh Pledge chhiar rualin hun an hmang a. Chanchinbu leh video clip hmang te a National Voters’ Day leh e-EPIC chungchang thehdarh niin, Khawzawl hmun lun laiah NVD poster tar a ni a. Sawrkar Office hrang hrangah te NVD Pledge chhiarchhuahna hun hman a ni bawk. 


Written by H. Lalramenga, SDC, Khawzawl District