Khawzawl, the 14th Nov. 2022: Ram chhung hmun dangte rualin vawiin khan District Child Protection Unit (DCPU), Khawzawl buatsaihin Tennis Court, PWD Complex, Khawzawl-ah National Children's Day lawmna pualin Children's Carnival buatsaih a ni a. He hun hi District Bawrhsap Pu C.C. Lalchhuangkima chuan khuallian niin a hmanpui a, ribbon chepchatin Children's Carnival a hawng a ni.

Carnival hawnna inkhawm zing dar 10:30 a  hman hi Pi Lalsiammawii, District Child Protection Officer (DCPO) chuan a kaihruai a. Khuallian Pu C.C. Lalchhuangkima, District Bawrhsap chuan naupangte tana ni bik pawimawh tak, Children's Day puala hun awl hman thatna tur intihhlimna tha tak mai buatsaih a ni chu lawmawm a tih thu a sawi a. Naupangte chu nu leh pate thu awih tur leh, tunlai sualna tinreng laka inthiar fihlima fimkhur fo thin turin a chah a ni.

Children's Carnival hian ngaihhlut a hlawhin chhimtu an thahnem hle a, naupang leh nu leh pa za chuang zet te'n Carnival hi an chhim a ni.