Khawzawl, 12th April 2024: Lok Sabha Inthlanpui, 2024-a Khawzawl District chhunga Assembly Segment awmchhun – 22-Tuichang-a Electronic Voting Machine (EVM) leh Voter Verifiable Paper Audit Trail (VVPAT) hman turte chu vawiin khan Khawzawl DC Auditorium-ah neih a ni.
He hunah hian polling station tina EVM (Control Unit + Ballot Unit) leh VVPAT hman turte chu a siamtu Electronics Corporation of India Limited (ECIL) aṭanga engineer lo kal ten hman theih turin an buatsaih a. A khawl lam buatsaih fel vek a nih hnuah candidate-te hming chhut luh niin, a kal dik leh dik loh enfiah leh vek phawt a ni a. Vote thlak nana hman theih mai tura peih felfai a nih hnuah khawih danglam theih tawh loh tura seal hmanga uluk taka char niin, dah ṭhat nghal zel a ni.
EVM Commissioning-ah hian official-te bakah Political Party aiawh te an tel a. Commissioning-ah hian Tuichang Bial chhunga Polling Station 28 a hman tur Control Unit 28, Ballot Unit 28 leh VVPAT 28 te bakah a thlavenga awm tur Control Unit 15, Ballot Unit 15 leh VVPAT 18 te chu hman mai theih tura buatsaih fel a ni.
