Ni 13.09.2024 chawhnu dar 1:00 pm khan Krishi Vigyan Kendra, Champhai District, Khawzawl chuan an Training Hall-ah District chhunga Tomato chingtute leh Tomato Growers a hruaitute nen Farmers Scientist Interaction leh Tomato chi semna hun an hmang a. He hun hi Dr. Malsawmkimi, Senior Scientist & Head, KVK chuan a kaihruai a, Pu K. Vanlalthiana, Deputy Commisioner Khawzawl District chuan khuallian niin a hmanpui a ni.

He hunah hian khuallian Pu K. Vanlalthiana DC, Khawzawl chuan thu sawiin KVK thawhrah chiang taka a hmuh theih hi lawmawm a tih thu a sawi a, kuthnathawkte tan thiamna sang zel kara ke pentu ropui tak an ni tih a sawi bawk a. Kuthnathawkte mipui tana entawn tlak an ni tiin a fak a, theihtawp chhuaha hlawk zawk tura hna thawk zel turin lo kal khawm te a fui bawk a ni.

Tomato chingtute hi khaw hrang hrang Tuipui, Tualte, Chawngtlai, Neihdawn, Rabung leh Khawhai atangin an kalkhawm a, he hunah hian Doubling Farmers Income (DFI) hnuaia KVK te adopted village, Tuipui leh Tualte khua a Tomato ching hlawhtling mi 2 (pahnih), Pu Vanlalmuana, Tuipui khua leh Pu CS. Lalhmangaihsanga, Tualte te hnenah Tomato ching hlawhtling Award pek an ni.

Pu Vanlalmuana, Tuipui khua hian KVK Khawzawl ten Tomato a On Farm Trial an tih hmasak ber kum 2015 khan ching tanin, kum 2016 khan Quintal 260 tharin, Rs. 12,00,000 (Nuai sawmpahnih) a lei chhuak a. Pu CS. Lalhmangaihsanga, Tualte hian kum 2023 khan Quintal 290 thar in Rs.11,00,000 (Nuaih sawmpakhat) a lo lei chhuak tawh bawk a ni.

Vawiin-a Tomato chi an sem hi Kg 8 niin Rs. 3,04,000 (Nuai thum leh sangli) man hu a ni a, heng khaw hrang hrang te hi cover zo tura ngaih ani. Tomato chi sem chhuah te hi Arka samrat leh Arka Abhed variety  te an ni a, hengte hi Indian Institute of Horticultural Research (IIHR-ICAR : NEH), Bengaluru te nena tangkawpin an pe chhuak a ni