Khawzawlah Kangmei Ven Hapta (Fire Prevention Week) hawng
3660/2023-2024
Khawzawl, 5th February 2023: Vawiin khan Mizoram hmun hrang hrang te rualin Khawzawlah pawh Kangmei Ven Hapta (Fire Prevention Week) hawnna hun neih a ni a. He hun hi Khawzawl Addl DC Pu Lalfakzuala chuan khuallian niin a hmanpui. Kangmei Ven Hapta hi Mizoram pumah February ni 5 - 9, 2024 chhunga hman tur niin, ‘Thapui thawhin kangmei chhuak tur i veng ang u’ tih chu thupuiah hman a ni.
Khawzawl Electric Veng YMA Hall-a hawnna inkhawm tawi hmanah thu sawiin Pu Lalfakzuala chuan Khawzawl chu District lian tak ni lo mah se kuthnathawk uar District an nih angin, kangmei laka invenna hapta neih hi a tul hle a ni, a ti a. January ni 23, 2024-a Khawzawl District Level Committee on Fire Prevention thu khawm thu rel hrang hrang te pawh sawiin - Khawzawl District-ah March ni 15, 2024 hma ngeiin lo hal vek tur a nih thu te, theh loh ram vat ten February thla ral hma ngeiin lo hal vek tur a nih thu te, kangmei venna kawnga thawk tha khua pathum te hnenah chawimawina pek a nih tur thu te a tarlang a ni.
Pu Lalfakzuala chuan Khawzawl chu kangmei venna kawnga District titha pawl ni thei se a duh thu sawiin, District chhung khawtlang hruaitu Village Council leh tlawmngai pawl hruaitu zawng zawng te chu kangmei venna kawnga thawhho puiah he hunah hian a sawm a ni.
He huna thusawitu dang Pu PC Rosiama, Honarary Wildlife Warden, Khawzawl District chuan Undivided Champhai chu kum 13 chhungin kum riat zet India rama District kang nasa ber a ni tih a tarlang a. Fimkhur loh vanga ram tih kan chu tih tawp theih a ni, a ti a. Kalkhawmte chu ram kang venna kawngah ngaihtuahna thar seng a, thangthar te tana ram nuam hnutchhiah ngei tum turin a ngen a ni.
Khawzawl District VC Association Chairman Pu K. Vanlalsiama pawhin thu sawiin kangmei venna kawnga Village Council leh tlawmngai pawl te hnathawh chu a fakawm hle a ni, a ti a. Vengchhung chanchinbu, tlangau leh social media kaltlangin kangmei ven inzirtirna uar leh zuala kalpui a tul a ni, a ti bawk.
Kangmei Ven Hapta hawnna inkhawm hi Pu Lalfakzuala, Khawzawl Joint VC Vice Chairman chuan a kaihruai a. Pu Hrangchungnunga, Lengteng Widlife Sanctuary Range Officer chuan inlawmna thu sawiin, kangmei venna kawnga hmalakna hrang hrang report a pe a. EF&CC Department buatsaih  kangmei ven inzirtirna Presentation thlirho a nih hnuah Pu T. Laltlanhlua, Range Officer, Khawzawl chuan lawmthu sawiin inkhawm hi tih tawp a ni.