Khawzawl,26th June 2024: Vawiin khan Khawzawlah International Day Against Drugs Abuse and Illicit Trafficking, 2024 chu Khawzawl DC Auditorium-ah Pu K. Lalrohlua, DC Khawzawl kaihhruaina a hman a ni.
He hunah hian Pu Lalchhuanthanga, SP Khawzawl in thusawiin Khawzawl chu ruihhlo tawlhrukna kawnga awm kan nih avangin ruihhlo hi kan khuaah a thlauh in an rawn thlauh a ni ber a,chu chuan nasa takin kan khawtlangah nghawng tha lo tak a nei a ni, a ti. Ruihhlo hian a mimalin min nghawng lo a nih pawhin, kan khawtlang nghawng thil a nih avangin kan ngaihthat thei ngawt lo a ni, a ti a, a nghawng chu nakina kan zahna leh kan khawtlang hnufum na tur a nih avangin theihtawpa chhungkua leh khawtlangah kan inhrilhhriat a tul a ni, ati. Pu Lalchhuanthanga chuan ruihhlo do tur hian Police leh Excise dept lam ngawt rin a hun tawh lo a, Sawrkar dept leh NGO hrang hrangte inlungruala ruihhlo do chet chhuah a hun tawh takzet a ni, a ti.
Vawiin inkhawm tawiah hian Khawzawl a NGO hrang hrang hruaitute leh Sawrkar department aiawhte an tel a, Rev Lalbiaksanga Pachuau,Counsellor,FG&CC in hunserh hmangin, Pu PC Rosiama, President, Sub-Hqrs YMA pawhin thu a sawi bawk a ni
Vawiin vek khan International Day Against Drugs Abuse and Illicit Trafficking pualin Khawzawl District Coordination Center (NCORD) te chuan Khawzawl a De-addiction Home pahnih Grace Camping Center leh Chhanchhuahna Home te chu an Chairman Pu K.Lalrohlua, DC, Khawzawl hoin an tlawh a, tanpuina pawisa fai cheng 5000 ve ve an hlan a ni.
