Khawzawl, 11th June 2024:  Vawiin khan Khawzawl DC Auditorium-ah ‘Green Mizoram Day 2024’ chu hman a ni a, Pu Lalfakzuala, Addl DC chuan khuallian niin he hun hi a hmanpui. Green Mizoram Day pual hian National Highway – 06 (Khawzawl – Champhai Road) Tuimuk lui kamah thing ṭiak 402 phun a ni.
Khuallian Pu Lalfakzuala chuan kalkhawmte chu Green Mizoram Day chibai bukin; thangthar lo awm zel tur te tan thing tam zawk phun a, hmun hring nuam zawk siam zel turin a sawm a. Khawzawl District chhungah kawngpui thar tha tak tak – National Highway -06 te, Khawzawl- Biate PMGSY Road te a awm thar a, heng kawngpui kamah te hian Mizoram sik leh sa mil, mitinte tana chhawrhnaawm tling thing phun i uar ang u, a ti bawk.
Pu Lalfakzuala hian District timawi thei thingkung, khawtual leh khualzin mite tan pawha hmuhnawm tham phun tha a a hriat thu a sawi a. Khawzawl Wildlife Division hnuaiah ram la vah loh te humhalha, Lengteng Wildlife Sanctuary leh Murlen National Park-te dawttu tur Ecological Park siam tha a tih thu a sawi bawk a ni.
Green Mizoram Day 2024 hmannaah hian Kangmei Ven Hapta 2024 puala buatsaih kangmei venna kawnga titha khuate chawimawina – ‘District Level Award for Fire Prevention’ chu Pu Lalfakzuala hian a sem chhuak a. Lawmman dawngtute chu
Pakhatna: Vanchengpui
Pahnihna: Khawhai
Pathumna: Khualen; te an ni.
Green Mizoram Day 2024 puala hun hman hi Pu PC Rosiama, Honarary Wildlife Warden chuan a kaihruai a. Pu Hrangchungunga, Range Officer, Lengteng Wildlife Sanctuary chuan Green Mizoram Day chungchang report a pe a ni. Pu HC Lalfakzuala, Range Officer, Murlen National Park chuan Green Mizoram Day puala thingphun dan tur inhrilhfiahna hun a hmanga, he mi hnu hian thingkung 402 phun turin NH-06, Tuimuk lei lam pan a ni.
Green Mizoram Day 2024 pual hian Khawzawl District chhunga sawrkar pisa hrang hrang te, Joint VC, tlawmngai pawl leh sikul hrang hrang ten thing an phun a. Pawl hrang hrang thingphunte hi mumal taka chhinchhiahna siam niin, Green Mizoram Day 2025-ah thingphun enkawl thate hi chawimawina pek an ni ang.