Khawzawl, the 11th June, 2021
Vawiin chawhma khan Green Mizoram Day pualin Khawzawl-a sawrkar department hrang hrang, Village Council leh NGO ten Mualvawm Park, Khawzawl Darngawn-ah thingphun hnatlang an nei.
Green Mizoram Day puala vawiina thingphun hi District Level Committee on Green Mizoram Day (DLCGMD), Khawzawl District buatsaih niin, Deputy Commissioner’s Office tual zawlah Inaugural Function tawite hman hmasak a ni a. Green Mizoram Day puala hlathu inphuahsiak lawmman leh, Kangmei ven kawnga khua tithate hnena lawmman semna hun hman nghal a ni bawk.
Pu Zothanmawia, Deputy Commissioner & Chairman, DLCGMD chuan thu sawiin, khua a lum tawlh tawlh a, tuihna a tlem zel a. Tunah chuan ramngaw humhalh mai piah lamah ramngaw siam te, tuihna leh nungcha humhalh te, thingphun uar te a tul hle tawh a ni a ti a. Chutiang atan chuan Green Mizoram Day hi a pawimawh a, tangkai taka hmang theuh turin kalkhawmte a chah a ni.
Khawzawl District Bawrhsap Pu Zothanmawia chuan sawi chhunzawmin, thing phun ah mai duhtawk lova, kan thingphun te a nung tha em tih ngaihven zui a pawimawh hle a ni a ti a. DLCGMD pawhin thing phun hrim hrim bakah leitha leh a hungna tur a ruahman tel chu lawmawm a tih thu a sawi bawk.
Pu C. Lalthankima, DFO (Wildlife) & Member Secretary, DLCGMD chuan Green Mizoram Day, 2021 Inaugural Function hi a kaihruai a. Green Mizoram Day pual hian Khawzawl District chhunga phun turin ni 11.06.2021 zing thlengin thing tiak 2,219 (sanghnih zahnih leh sawmpakua) semchhuah a nih tawh thu a tarlang a ni.
Khawzal District chhunga kangmei ven kawnga khua tithate hnenah lawmman sem niin, lawmman pakhatna latu Vankal Village Council chuan pawisa fai Rs. 50,000/- (Cheng Singnga) an dawng a. Pahnihna Hmuncheng VC in Rs. 30,000/- (Cheng Singthum) dawngin, pathumna Khawzawl Darngawn VC in Rs. 20,000/- (Cheng Singhnih) an dawng a ni.
Green Mizoram Day, 2021 puala hlathu inphuahsiak lawmman pawh sem niin, Pi Jenny Hauzel, Khawzawl Vengthar chuan “Vul zel ang che” tih hla hmangin lawmman pakhatna a la a. Pi H Lalbiakengi, “A chuai zo ta” leh Pu Rammuanthanga, “A pawi vawng vawng” te chuan lawmman pahnihna leh pathumna an la bawk a ni.
Inaugural Function zawhah hian Mualvawm Park-ah Khawzawl-a sawrkar department hrang hrang te, District VC Association, YMA, MHIP leh NGO dang aiawh ten thingphun hnatlang neih zui a ni a, department pakhatin thing tiak pahnih theuh an phun a ni.
Written by H. Lalramenga, SDC, Khawzawl District
