Khawzawlah Final Electoral Roll tlangzarh a ni

Khawzawl, 8th February 2024: Vawiin khan Khawzawl District Deputy Election Officer Pu Lalfakzuala chuan Special Summary Revision 2024 neih zawh tak hmanga buatsaih Khawzawl District (22-Tuichang AC) Final Electoral Roll, 2024 chu Election official, political party leh tlawmngai pawl aiawh kalkhawmte hmaah a tlangzarh.

Khawzawl DC Meeting Hall-a tlangzarhna inkhawm neihah Khawzawl Dy DEO, Addl DC ni bawk Pu Lalfakzuala chuan Electoral Roll thar chu Election Commision of India-in dan a siam hmangin uluk taka duan thin a nih thu a sawi a. Roll thar felfai tak buatsaih a nih theih nana thawktu te zawng zawng chungah lawmthu a sawi a ni.

Election Officer Pu Timothy R. Lalhmangaiha chuan he hunah hian Electoral Roll 2024 tlangzarh tak chungchang report tawi a pe a. Khawzawl District Administration hnuaia Assembly Constituency/ Segment awmchhun 22-Tuichang AC ah hian tun dinhmunah mihring 26,527 awm anga chhut a ni a. Heng zinga mi 18,324 te chu vote nei theia ngaih niin, vawiina tlangzarh tak Final Electoral Roll-ah hian voter 17,575 - mipa 8,740 leh hmeichhia 8,835 an awm a. Mipa aia hmeichhe voter tamna hi 95 a ni. Special Summary Revision 2024 hi Draft Electoral Roll, January ni 6, 2024 a tlangzarh tak behchhan a siam a ni a. Draft Roll nen a khaikhinin Final Electoral Roll-ah hian voter 72 in an pung a, Roll chungchang khaikhawmna hi a hnuaia document-ah hian en theih a ni.