Khawzawl, the 26^th February, 2021:

Vawiin chawhma dar 11:00 khan Pu Lalrohlua, Additional DC hovin Khawzawl District-a CSC Operator te leh, DC Office-a e-District khawihtute chu DC’s Conference Hall, Khawzawl-ah an thukhawm a, zau zawk leh tangkai zawka e-District kalpui dan tur an sawiho. 

Vawiina meeting-ah hian e-District chu Khawzawl District mipui tam zawk banphaka chhawp hnaih lehzual a nih theih nan CSC hawn belh dan tur ngaihtuah a ni a. e-District kaltlanga service tam zawk pekchhuah a nih theih nan sawrkara rawtna thlen tha tih a ni bawk. 

He hunah hian Pu Lalrohlua chuan CSC Operator te tana hriattur pawimawh hrang hrang a tarlang a. CSC Operator te pawhin e-District hmanga dilna an thehluhte a hun taka hma an laksak thin avangin DC office a thawkte chungah lawmthu an sawi a ni. 

Khawzawl District-ah hian October ni 16, 2020 atangin e-District kalpui tan a ni a. Tun dinhmunah Khawzawl, Khawhai, Chhawrtui, Kawlkulh leh Sialhawk-ah te CSC operator pakhat theuh awmin, vawiin thleng certificate hrang hrang pekchhuah tawh zat hi 1,060 a tling a ni. 

Written by H. Lalramenga, SDC, Khawzawl District