Ni 10.10.2024 chawhma dar 11:00 a.m khan DC Meeting Hall-ah District Sports Committee chuan meeting neih a ni a, Khawzawl Deputy Commissioner leh Committee Chairman ni bawk, Pu K. Vanlalthiana chuan meeting a kaihruai.

Meeting tan a nih hnu ah Pu Elijah L.H. Sanga, Secretary, District Sports Committee leh District Sports & Youth Services Officer ni bawk chuan committee thutkhawm chhan te sawiin Senior Vice Chairman, Vice Chairman leh Assistant Secretary thlan thar a tul thu a sawi a, inthlan hun te, returning officer leh polling officer ruat tur te rel ho a ni. Finance Secretary, District Sports Committee atan hming 2 thehluh ngai chu sawi ho niin mi 2 thlan an ni bawk a, Mizoram State Sports Council hnena thehluh tur niin council hian a lo thlang dawn a ni. Sports association member rawn kal te'n committee hnena an thlen duh hrang hrang an thlen bawk a, an harsatna te, an ngaihdan te leh an vei zawng te an sawi ho bawk a ni. Chairman Pu K. Vanlalthiana chuan sports committee thutkhawmna lo tel zawng zawng te hnenah lawmthu a sawi a, Khawzawl district a inkhel mi te, thalai te leh naupang te'n sports lama hma an sawn zel theih nan tangruala theihtawp chhuah turin a sawm bawk a ni.

He meeting-ah hian SDO (Sadar), Pu Suvigya S. Chandra, IAS, District Sports Committee office bearer te leh sports association hrang hrang hotute an tel bawk a ni.