Khawzawl, the 12th April, 2021:
Vawiin chawhnu dar 3:00 khan Khawzawl District Level Task Force on Covid-19 chu an chairman Pu Zothanmawia hovin DC Conference Hall, Khawzawlah an thukhawm a. An hmalak tawh dan thlirletin, Covid-19 hrileng dona kawnga hmalak zel dan tur an ngaihtuah.
Vawiina meeting-ah hian Mizoram sawrkar thuchhuak angin zan curfew chu khauh zawka kalpui nise tiin rel a ni a. Covid-19 hrileng a darh lohna tura sawrkarin inkaihhruaina a siamte kengkawh a, khauh zawka duty turin veng/khua hrang hranga VLTF te bakah sawrkar hnathawk ruat nise tih a ni bawk.
Meeting-ah hian Khawzawl District chhunga Covid-19 vaccination dinhmun tarlan niin, tun thlenga Covid-19 vaccine la tawh zat chu mi 382 an ni a. Heng zinga mi 185 te chuan vaccine 2nd dose an la tawh tih tarlan a ni.
Khawzawl DLTF on Covid-19 chuan mipui punkhawmna lam chi – sakhaw biak inkhawm, games & sports, chhiatni thatni, sawrkar programme leh pawl anga punkhawmna chi reng rengah, sawrkarin inkaihhruaina a siamte chu zawm a nih theih nan order chhuah a, order kengkawh tura hmalak zui zel nise tiin a rel a. Mizoram pawn atanga rawn lut khunghran ngai te dahna tur Community Quarantine Facility leh, Covid-19 positive natna langchhuak lote enkawlna tur Covid Care Centre ruat nghal a ni bawk.
Written by H. Lalramenga, SDC, Khawzawl District
