Khawzawl, the 23rd November, 2022: Vawiin chawhma dar 10 khan Khawzawl District Level Aadhaar Monitoring Commiittee chu an Chairman Pu C.C. Lalchhuangkima, District Bawrhsap hovin DC Conference Hall-ah an thukhawm. He hunah hian UIDAI Regional Office, Guwahati atangin Pu Padmakumar Das, Deputy Director leh Official dangte an rawn tel bawk a ni. 

Pu C.C. Lalchhuangkima chuan Aadhaar chu  Central sawrkar kaltlanga scheme hrang hranga direct benefit transfer tihna atana hman nasat anih thu leh Aadhaar nei lote tan harsatna a thlen theih avangin mitinte chu Aadhaar nei vek turin a chah a. Aadhaar chu puitling tan chauh ni lo naupangte pawhin an neih vek a tul thu a sawi a. India khua leh tui nilo ramdang mite hnena Aadhaar pekin harsatna a thlen theih avanga fimkhur a tul thu pawh sawiin, document update kalpui chu mitinte hmang tangkai turin a chah a ni.

Meeting-ah hian Aadhaar Document Update Project neih mek bawhzui dan tur leh Khawzawl District-a Aadhaar enrolment tihna kawnga  harsatna awmte sawiho a ni a. Pu Padmakumar Das, Deputy Director, UIDAI Regional Office Guwahati chuan powerpoint presentation hmangin Aadhaar chungchang a hriattur pawimawh leh District lama tih turte a sawifiah a, sawihona hun hlawkthlak tak neih a ni. Heng bakah hian Department leh Community Service Centre te'n harsatna an tawh thenkhatte chinfel dan tur sawiho nghal a ni bawk. 

Meeting-ah hian SP Pu Lalchhuanthanga, Lead District Manager (LDM) Pu JM Soren leh Member dangte an kim hle a ni.