Khawzawl, 25th August 2023: Vawiin khan Khawzawl District Cooperative Development Committee (DCDC) chu a vawikhat nan Khawzawl DC Conference Hall-ah an thu khawm a. Meeting hi Khawzawl DC Pu K. Lalrohlua chuan a kaihruai a, District chhunga Cooperative kaihhnawih department bakah pawl hrang hrang hruaitute he hunah hian an tel a ni.

Meeting-ah hian District chhunga Cooperative hmalakna hrang hrang te thlir ho a ni a. Champhai District Cooperative Officer Pu B. Lalchhanhima chuan report pein, Khawzawl District chhungah Cooperative Society 44 ziah luh (register) an ni tawh tih a tarlang a. Khawzawl District-ah hian Village Council 38 awmin, khaw 14 ah cooperative society hian hmalakna hnuhma an nei tawh a ni, a ti bawk. Mizorama Primary Agriculture Credit Society (PACS) computerize tur 25 zingah Rabung Cooperative Society a tel thu tarlangin, Khawzawl District chhunga cooperative society 4 te chu PACS a hlankai turin ‘bye-laws’ te pawm sak an ni tawh, a ti a. Sawrkar laipuiin PACS 2000 te chu man tlawm zawka damdawi zawrhna hmun ‘Pradhan Mantri Bhartiya Jan Aushadi Kendra’ hawn a phal sak thu leh phal sak zingah hian Rabung PACS pawh a tel thu meeting-ah hian sawi lan a ni.

Vawiin thutkhawmah hian cooperative society din leh a hlutna inzirtir zel a ngaih thu pawh tarlan a ni a. India hnampa Mahatma Gandhi pianchampha October ni 2 a Gram Sabha neih turah khawtina inzirtirna kalpuina turin District Cooperative Office in ‘pamphlet’ lo siam se ti a thu dah a ni.