Ni 15.10.2024 chawhma dar 11:00 a.m khan DC Meeting Hall-ah District Cooperative Development Committee hnuaia sub-committee, Joint Working Committee chu Khawzawl district hmun hrang hranga cooperative society dinhmun sawi ho turin an thukhawm a, Addl. Deputy Commissioner, Pu Lalfakzuala'n he meeting hi chairman niin a kaihruai.
He hunah hian Pi H. Lalhmachhuani, District Development Manager, NABARD, Champhai chuan PowerPoint presentation hmangin sawi hawnna leh sawi zauna hun a hmang a, "Sahakar-se-Samriddhi" policy (Cooperation through Cooperatives) hnuaiah cooperative society hrang hrang, Primary Agriculture Cooperative Society (PACS) te, dairy leh fisheries lam pawl din sawrkarin rem a tih avanga committee thukhawm an nih thu a sawi. Meeting-ah hian heng pawl hrang hrangte dinna hmun tur te, pawl thiah (liquidate) ngai te, pawl hrang hrang kalhmang leh thawh dan tur chungchanga thurawn leh tanpuina pek dan tur hrang hrang te leh thil tul dang te rel a ni a, heng thurel hrang hrang hi District Cooperative Development Committee hnena thlen leh tur a ni. Committee hian PACS 15, Dairy Cooperative Society 1 leh Fisheries Cooperative Society 1 din a rel a, heng din thar tur te hi Khawzawl khaw hrang hranga thlai chingtu te awm dan azira rel a ni. Chairman Pu Lalfakzuala chuan he huna lo kal khawmte hnenah lawmthu a sawi a, Khawzawl district hma a sawn zel theih nan leh thlai chingtute tana hna tha zawk leh hlawk zawk siam a nih zel theih nan theihtawp chhuah zel turin a fuih bawk a ni.
He hunah hian SDO (Sadar), Pu Suvigya S. Chandra, IAS; SDC, Pu Elijah L.H. Sanga; MCAB Khawzawl Branch Bank Manager, Pu Lalchhuanawma; District A.H. & Vety Officer, Dr. Ruby Ngurnunmawii leh Cooperation Audit Officer, Pu Lalmuanpuia te an tel a ni.
Sahakar-se-Samriddhi hnuaiah hian heng cooperative society hrang hrang hi kum 5 chhungin India ram chhunga khua (village) zawng zawnga din tum a ni a, Ministry of Cooperation chuan NABARD, National Dairy Development Board leh National Fisheries Development Board te nena tangkawpin Standard Operating Procedure, Margdarshika a siam a, hemi hmang hian kalhmang tlangpui bakah kum 5 chhunga thiltum leh zawh hun tur tur hrang hrang duan nghal vek a ni
