Khawzawl 10th. March, 2021 : Khawzawl khawpui chhunga Village Council 10 a VC Member te tan ni 2 awh tur “Integrating Disaster Management Plan and Solid Waste Management Plan in GPDP” chu SIRD & PR Extension Training Centre, Thingsulthliah bultumin vawiin atangin Zaingen YMA Hall-ah neih tan a ni a, vawiin chawhma dar 10:00 khan Training hi Khawzawl Sub-Deputy Commissioner, DM&R Nodal Officer ni bawk Pu H. Lalramenga chuan khuallian niin a hawng a ni.
Training Hawnnaah hian thu sawiin khuallian SDC Pu H. Lalramenga chuan SIRD & PR, Thingsulthliah ETC in Khawzawl khawpui chhunga VC Member te tana tana Training tangkai tak leh pawimawh tak an buatsaih chu lawmawm a tih thu a sawi a, a bikin Disaster Management Plan chungchang bikah phei chuan chhiatrupna thleng tur hi hriat lawk theih anih loh avangin chhiatna leh harsatna eng pawh kan chungah lo thleng se la, chiai lo leh awmze nei a kan hmachhawn theihna turin kan inbuatsaih lawk a, Disaster Management Plan mumal tak hi VC tin leh khawtinin kan neih a tul hle a ni a ti a. Hemi hnu hian Disaster Management chungchang sawifiahna leh Khawzawl District Disaster Management Authority (DDMA) hnuaia hmalakna hrang hrangte a tarlang tel bawk.
Training-ah hian SIRD & PR Extension Training Centre, Thingsulthliah Principal Pu Lalthanmawia Ralte leh Faculty Pu K. Lalbuatsaiha te chuan thupui thlan bik hmangin Khawzawl khawpui chhunga VC Member kalkhawmte zirtirna an pe a, vawiin bikah hian Waste Management Rules, 2016, Behavorial Change, Model for Rural Solid Waste Management tih thupui hmangte in inhrilhhriatna an nei a, zawhna leh chhanna hun leh sawihona hun te an hmang zui nghal a ni.
Naktukah Training hi Zaingen YMA Hall-ah neih chhunzawm a ni leh dawn a, hetah hian Mizoram Disaster Management Rules, Village Disaster Management Committee : Roles and Responsibilities, Preparation of Village Disaster Management Plan, Integration of Village Disaster Management Plan with GPDP tih thupui hmangte in VC Member te hnenah zirtirna an pe leh dawn a ni.
Written by H. Lalramenga, SDC, Khawzawl District
