Khawzawl, the 23rd September, 2021

Vawiin chawhma dar 10:30 khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District chuan Khawzawl District-a chhungkaw harsa zualte chhawmdawlna tur semchhuakin a vailiam. 

Hemi puala DC Office kawt zawla programme tawi hmanah Khawzawl District Bawrhsap Pu C.C. Lalchhuangkima chuan Covid-19 hrileng do nana inkhuahkhirhna hrang hrang kalpui a ngai thin leh, chumi avanga chhuanchham leh chhuanchham maithei dinhmuna ding chhungkaw engemawzat chhawmdawl ngai an awm thin chu pawi a tiin a tawrhpui tih a sawi a. Chhuanchham leh harsa zawkte tanpui tura DC Office staff ten theihtawp an chhuah thin chu a lawmawmin, District khata Office pui bera thawkte tih atan pawh a inhmeh hle a ni, a ti. 

Pu Lalrohlua, Additional Deputy Commissioner kaihhruai programme-ah hian Pu F. Hmingsangzuala, LDC, DC Office in report a pe a.  Chhawmdawlna pekte hi Khawzawl District-a khaw pali heng – Biate atangin chhungkaw 127, Chawngtlaiah chhungkaw 43, Ngaizawl atangin chhungkaw 100 leh Sialhawkah chhungkaw 10, an vaiin chhungkaw 280 an ni tih a tarlang a. Heng chhungkaw 280 ah hian mihring 1225 an awm a ni.

Chhawmdawlna hi mi pakhatah buhfai kg 5 zel leh, chhungkaw pakhatah dal kg 1 zela sem niin, a vaiin buhfai quintal 61.25 leh dal kg 280 semchhuah a ni a. Chief Minister’s Relief Fund, Khawzawl Officers Club leh mimal atanga lutkhawm Rs. 2,40,250 (cheng nuai hnih, singli zahnih sawmnga) senral a ni

Vawiina chhungkaw harsa zualte chhawmdawlna semna hunah hian DC Office Staff bakah Khawzawla Mizoram Journalist Association aiawhte an tel a ni. 

Written by H. Lalramenga, SDC, Khawzawl District