Khawzawl, the 10th September, 2021

Ni 06.09.2021 a District Disaster Management Authority (DDMA), Khawzawl District thukhawmin a lo rel tawh bawhzuiin vawiin chawhma dar 11:30 khan Pu C.C. Lalchhuangkima, Deputy Commissioner & Chairman, District Disaster Management Authority, Khawzawl District chuan Restricted Area-a puan chhunga chhungkaw harsa zualte chhawmdawlna tur semchhuakin a vailiam. 

Hemi puala DC Office kawt zawla programme tawi hmanah Khawzawl District Bawrhsap Pu C.C. Lalchhuangkima chuan Khawzawl District chhungah Covid-19 vanga chhuanchham leh chhuanchham maithei dinhmuna ding chhungkaw engemawzat an awm chu pawi a tih thu a sawi a. Lawmman beisei miah lova khawtlang tana theihtawp chhuah thintu Village Level Task Force leh YMA te bakah mi harsa zawkte tanpuina tura luangchhuak Khawzawl Officers Club leh mimal inphalte chungah lawmthu a sawi bawk. 

Pu James Lalnithanga, SDO (Sadar) kaihhruai programme-ah hian Khawzawl DC chuan sawi chhunzawmin, hmalam hunah engnge Covid-19 hrileng dinhmun tur a hriat loh avangin inthlahdah theih a ni lo a, hrileng dinhmun ziaawm hret hret angin lang mah se thawk leh khata inthlahdul vak a la rem rih lo a ni, a ti a. Ei leh bar leh nitin mamawh thawkchhuak tura hnathawh chu ngaihpawimawh a tul tih tarlangin, thil dang chu insum rih a la ngai tih a sawi a. VLTF leh tlawmngai pawl hrang hrang te chu Covid-19 hrileng darh zel lohna tura thawhpuiah a sawm nghal bawk a ni. 

Khawzawl Officers Club (KOC) President Pu R. Lalrintluanga pawhin thu sawiin, DDMA in thawhpui tura a sawm angin KOC chu Covid-19 hrileng dona kawngah theihtawpin a tang tih a tarlang a. VLTF leh tlawmngai pawl hrang hrangten tha taka District Authority an tawiawm thinnaah lawmthu a sawi bawk a ni. 


Pu K. Lalremruata, DC Office Staff member in a tarlan danin Covid-19 hrileng vanga Restricted Area-a puan khaw pathum heng – Khawzawl, Biate leh Chawngtlai a VLTF ten chhuanchham leh chhuanchham maithei dinhmuna ding chhungkaw 383 an awm thu thehlutin, chhungkaw member zat chu mi 1,418 a ni a. Chhawmdawlna hi mi pakhatah buhfai kg 5 hisap leh, chhungkaw pakhatah dal kg 2, tel packet 1 leh nutrela kg chanve zel hisapin pekchhuah a ni a. Chhawmdawlna semchhuah zawng zawng zat hi buhfai quintal 71, Dal kg 776, tel packet 383 leh nutrela kg 191.5 a ni. Hengte hi DC office-ah phurhkhawm niin, DC Office staff ten veng hrang hrangah an semchhuak a ni.



Khawzawl District-a chhungkaw harsa zualte chhawmdawl nan hian Rs. 3,88,700 (cheng nuai thum, singriat sangria zasarih) senral a ni a. KOC leh mimal inphal sum thawhkhawmte bakah Chief Minister’s Relief Fund atanga chhawmdawlna hi sem a ni.

Vawiina chhungkaw harsa zualte chhawmdawlna semna hunah hian Khawzawl Town chhunga VLTF aiawhte leh Khawzawla Mizoram Journalist Association te an tel bawk a ni.



Written by H. Lalramenga, SDC, Khawzawl District