Khawzawl, the 10th December, 2021:

Vawiin chawhma dar 11:00 khan Pu C.C. Lalchhuangkima, Deputy Commissioner, Khawzawl District hovin DC Office Conference Hall-ah Khawzawl District chhunga Office hrang hrang hotute an thukhawm a, India Sawrkar hnuaia Department of Administrative Reforms & Public Grievances (DAR&PG) in mipui hnena sawrkar rawngbawlna tehfung hrang hrang a siam, Good Governance Index, 2021 chungchang an ngaihtuah. 


Meeting-ah hian Good Governance Index, 2021 a tehfung (Indicators) tharte inhrilhhriatna hun hman niin, heng tehfung hrang hranga Khawzawl District huam chhunga sawrkar department te dinhmun leh hmasawn ngaihna lai te, hmasawn tura hmalak theih dan turte sawiho a ni a. Kuthnathawktute leh an thil tharchhuah lei duhtute awlsam zawka inhre tawn a, thlunzawm an nih theih dan tur te, ranvulh lama intodelh thei tura hmalak dan turte ngaihtuah ho a ni. 

Tehfung pawimawh thenkhat heng – online a service hrang hrang mipuite hnena pekchhuah kawngah te, Health & Wellness Centre kalpui dan te, khawpui chhunga bawlhhlawh lakkhawm te, Social Welfare & Development kaihhnawihah te chuan Khawzawl District dinhmun a tha thawkhat niin meeting-ah hian tarlan a ni a. District chhunga Vankal khuaah ni zung chakna hmanga electric power siamchhuahna (solar power plant) kalpui mek a nih thu leh, Tualte ah pawh kalpui thuai beisei a nih thu ngaihthlak a ni. Tin, mipuite mamawhna phuhru turin Union Bank of India, Khawzawl Branch hawn thuai a nih beisei a nih thu tarlan a ni bawk. 

Meeting-ah hian DAR&PG siam powerpoint presentation pawh thlirho niin, an department kaihhnawih tehfung theuhah hmasawn ngei tura hma lo la turin Khawzawl District-a Office zawng zawngte ngen nise tiin a rel a. Department hrang hrangten report mumal tak buatsaihin, remchang hmasa berah meeting leh nise tiin thutlukna siam a ni. 

Vawiina meeting-ah hian DC office-a Officer te bakah Khawzawl District-a UD&PA, Rural Development, PWD, P&E, Education, Agriculture leh Social Welfare Department hotute an tel a ni. 


Written by H. Lalramenga, SDC, Khawzawl District

Attachment