Khawzawl, the 5^th April, 2022 : 

District Level Fire Prevention Committee, Khawzawl District chu vawiin chawhma dar 11:00 khan DC Conference Hall-ah an Chairman C.C. Lalchhuangkima hovin an thukhawm a, hetah hian District chhunga kangmei ven kawnga hmalakna kalpui dan thlirletna an nei a ni.

Meeting-ah hian Chairman District Bawrhsap Pu C.C. Lalchhuangkima chuan kumin chhunga kangmei chhuak a tam lo chu lawmawm a tih thu sawiin District Level Fire Prevention Committee Member, Village Council te, YMA leh NGO hrang hrangte thahnemngaihna leh thawhhonaah lawmthu a sawi a, fur ruahtui tlak hma chuan kangmei chhuak thei reng a nih avangin fimkhur a tul thu a sawi. D.C. chuan Mualvawm Field leh Helipad bul vel te chu Bialtu MLA, Deputy Chief Minister Pu Tawnluia duh angin ramngawah siam vek tuma hmalak a nih thu a tarlang bawk a, Mualvawm Field leh Helipad bul velah te hian Khawzawl khawpui chhunga Sawrkar Department hrang hrangte chuan chan chin neiin thing an phun ang a, thingphun te hi a puitlin theihna turin an vil zui dawn a ni.

Meeting-ah hian Member Secretary, DFO (Wildlife Division) Pu Samson Thanruma chuan Report pe in, Khawzawl District chhungah lo hal vanga ram kang zau zawng chu Hectare 1489 vel a nih thu leh vawiin thlenga Record-a a lan danin March ni 15 hnulamah lo hal an awm lova, khaw hrang hrangin Sawrkar thupek an zawm tha thawkhat tih a sawi a. Lo hal piahlam a ram tikang palh khaw 3 an awm thu leh ram kang zau zawng hi Hecatre 2 vel a nih thu a sawi a. Khawzawl Wildlife Division hnuaia awm Lengteng Wildlife Sanctuary leh Murlen National Park chu kangmei lakah a him thu a sawi bawk. 

Meeting-ah hian kangmei ven kawnga Department hrang hrang hmalakna te thlirho niin, ruahtui tlak hma chuan theihtawp chhuahin hmalak zui zel nise, mipuite hnenah pawh kangmei tichhuak lo tura zirtirna neih chhunzawm zel nise an ti a ni.

Written by H. Lalramenga, SDC, Khawzawl District