Khawzawl, the 27th August, 2021:
Nimin chhun dar 12:00 khan Pu C.C. Lalchhuangkima, Deputy Commissioner, Khawzawl District hovin District Level Coordination Committee for Fostering Climate Resilient Upland Farming System in the North East (FOCUS) chu DC Office Conference Hall, Khawzawl-ah an thukhawm.
Khawzawl District Bawrhsap Pu C.C. Lalchhuangkima chuan meeting-ah hian thu sawiin, FOCUS chu kuthnathawktute leh mipuite tana hamthatna tamtak pawchhuak thei a nih avangin, tangkai taka hman a nih theih nan department hrang hranga thawktute chu thawhho tha tak hnuaiah theihtawp chhuah thin turin a fuih a. FOCUS hnuaia thlai chingtute chu a chi pek mai a duhtawk lova, tharchhuah hlawk zawk leh tha zawk an neih theih nan zirtirna pe a, enpui zui a pawimawh hle a ni, a ti a. Thlai chingtuten neitu nihna rilru pu a an thawh theih nan mawhphurhna pe thiam turin thawktute chu a chah bawk a ni.
Nimin meeting-a Pi Lalnunpuii Parte, Block Agriculture Officer & District project Manager, FOCUS in a tarlan danin FOCUS Project hnuaiah hian Khawzawl District chu Circle pathumah then niin, Kawlkulh circle hnuaiah khaw 6 (paruk) a awm a, Khawhai circle hnuaia khaw 10 (sawm) awmin, Khawzawl circle-ah khaw 16 (sawmparuk) a awm bawk. Loneitu intelkhawm pawl, Farmers Interest Group (FIG) hi 416 awm mekin, heng zinga 92 te chuan FIG Grant pawh an dawng tawh nghe nghe a ni.
Khawzawl District-a circle hrang hrang pathumahte hian a ram leilung leh boruak azirin thlai chi hrang hrang chin thin a ni a. Tun dinhmunah lonei mi chhungkaw 1,358 (sangkhat zathum sawmnga pariat) hnenah thlai chin tur hrang hrang heng – thingfanghma, balhla, lakhuihthei, RCM (Rice), vaimim, soybean, dragon fruit, alu, slake lime chi bakah leitha te sem tawh a ni. A bikin Horticulture Department nen a thawhhona tha tak hnuaiah Dragon Fruit chu quintal 42 chuang thar chhuah tawh niin, heng hi District chhung khaw hrang hrang bakah Mizoram chhung leh pawn hmun dangahte pawh thawnchhuah a ni tawh a ni.
FOCUS Project kaltlangin Khawzawl District chhungah tui leh lei luangral tur ven nan check dam 52 sak zawh tawh a ni a. Tuikhawlna leh semna (Water Storage & Delivery sytem) 20 siam zawh tawh niin, thawh mek lai 6 (paruk) a awm bawk. Tin, chhungkaw 252 tan ram hectare 37.8 a zauah Bench Terracing tih a ni tawh bawk a ni.
Nimina meeting-ah hian District Management Unit, Khawzawl District-a thawkte bakah line department hrang hrang heng – Rural Development, Horticulture Department, Agriculture Department, Animal Husbandry & Veterinary Department, District Rural Development Agency, Forest (Wildlife) leh District Village Council Association atang te in aiawh an tel a ni.
Written by H. Lalramenga, SDC, Khawzawl District
