Khawzawl 25th. January, 2021 :

Khawzawl District Hospital huamchhunga Health Care Workers te hnenah vawiin atang khan COvID-19 Vaccine, Covishield chu pek chhuah tan a ni a, COVID-19 Vaccine hi Khawzawl District Hospital huamchhunga Health care Workers 147 in an la dawn a ni.



 

Khawzawl District Hospital huamchhunga Health Care Worker te hnena COVID-19 Vaccine pek chhuah hma vawiin chawhma dar 10:15 khan Khawzawl District Hospital-ah hun tawi hman a ni a. He hun hmanpuitu Khawzawl District Bawrhsap Pu Zothanmawia chuan thu sawiin COVID-19 Vaccine in Khawzawl District a lo thleng ve ta chu lawmawm a tih thu a sawi a. COVID-19 vang hian nikum March atangin tun thlengin nunphung buai mahse tunah hripui kai kan tlem chho zel a, Sawrkar pawhin inkaihhruaina a duan te a thlahdul chho zel thei chu a lawmawm hle a ni a ti. Khawzawl District-ah COVID-19 kai hi mi 23 an awm tawh thu leh heng mite hi phailam atanga rawn haw vek an ni a, tualchhunga inkaidarh a la awm lo tih a sawi. 

 

Deputy Commissioner chuan tun thla 10 chhunga hripui beihnaah leh invennaah Health Care Worker te chu a thawk nasa ber leh a hah ber an ni a, Vaccine la hmasa ber tur an ni chu a lawmpui thu leh, Covid-19 vaccine kaihhnawih a thudik tawk lo leh thuthang awm thin te chu awih mai lovin, Doctor te thu sawi ring zawk turin a chah bawk a ni.

 

Vawiina Vaccine pek chhuahna puala inkhawm tawi buatsaih hi Khawzawl District Medical Superintendent Dr. Frank Harris-a'n kaihhruaiin, Dr. PB Zodingliana, District Immunization Officer, Champhai District leh Dr. Albert Lalzikpuia Ralte, Vaccine Cold Chain Manager, Champhai District ten Vaccine chungchangah hriat tur tul pawimawh te an sawi a. WHO Consultant Dr. Adhikari chuan Health Care Workers te chu vaccine 2nd Dose an lak zawh hunah mipuite hnenah a hlauhawm lova, a him tih hrilh hre turin a chah ve bawk.

 

Vaccine hi Centre khatah nikhatah mi 100 hnenah an pe chhuak dawn a, Vaccine latute hi First Dose an lak zawh hnuah darkar chanve an awm hahchawlhtir zel a ni. 


Written by H. Lalramenga, SDC, Khawzawl District