Khawzawl, the 19th September, 2020: 

Khawzawl District Deputy Commissioner & Chairman, District Level Task Force on Covid-19 Pu Zothanmawia thupek bawhzuiin, Covid-19 chungchanga sawrkar thuchhuah hrang hrangte zawm a ni em tih Khawzawl chhunga veng hrang hrangah Zonal Officer, VLTF leh Police te'n ni 16-19.02.2021 chhung khan sawi lawk lovin an endik.

Hetianga hrilh lawkna awm lova endik thutnaah hian dawr leh sumdawnna hmuna dawrtute chinchang hriatna tura Sulhnu app/Register vawn leh hand sanitizer chhawp te, mipui phur lirthei khalhtu te, infiamna hmun te, Restaurant leh thingpui dawr bakah, mipui vantlangin mask vuah tura thupek an zawm tha em tihte endik  nghal zel a ni. 

Endikna atang hian dawrkai leh sumdawng thenkhat, register a phone number leh address dah mumal lo an awm tih hmuhchhuah niin, a pawimawhzia inhrilhfiahin uluk lehzuala vawng chhunzawm tura hriattir nghal zel an ni. Sawrkar thupek zawm lo mi thenkhatte chu dan anga pawisa chawitir an ni bawk. 

Hrilh lawk lova endikna kalpui thin chu a khat tawkin neih thin a ni dawn a. Covid-19 hri leng mek chu Mizoramah ziaawm lam pan chho zel niin a lang a, hei hi thawktute leh mipui inlungrualna leh thawhhona rah a ni. He hrileng hi a darh zel lohna turin mipuite chu inthlahdah lo a, kan himna tura sawrkarin inkaihhruaina hrang hrang a tihchhuahte zawm zel turin District Level Task Force on Covid-19, Khawzawl District chuan mipuite a chah a ni.

Written by H. Lalramenga, SDC, Khawzawl District