Khawzawl, the 6^th September, 2021

Vawiin chawhnu dar 3:00 khan Khawzawl District Disaster Management Authority chu an Chairman Pu C.C. Lalchhuangkima, Deputy Commissioner hovin DC Office Conference Hall-ah an thukhawm a, Khawzawla Covid-19 Mass Testing kalpui mek dan thlirhoin, Covid-19 vanga Restricted Area-a puan khua/venga chhungkaw harsa zualte tanpui dan tur an ngaihtuah.

Khawzawl District-ah hian khaw pathum heng – Khawzawl, Chawngtlai leh Biate – te chu hmun khuahkhirh bik, Restricted Area-ah puan a ni a. Heng khuaa Village Level Task Force te report danin inkhuahkhirhna khauh zawk kalpui vanga hnathawk thei lo, chhuanchham leh chhuanchham dinhmuna ding mai thei hi Khawzawlah chhungkaw 279, Biate ah chhungkaw 99 leh Chawngtlaiah chhungkaw 8, an vaiin chhungkaw 386 an awm mek tih meeting-ah hian tarlan a ni.

Vawiin DDMA thukhawm chuan heng chhungkaw harsa zualte tan hian Chief Minister’s Relief Fund atangin chhawmdawlna sem thuai nise tiin a rel a, a tul anga thawhhopui tur leh hma lakpui turin Khawzawl Officers Club sawm nise tih a ni bawk. 

Khawzawl District Bawrhsap hova DDMA thukhawm chuan Khawzawla Covid-19 Mass Testing kalpui mek thlirhoin, tun dinhmunah sample 4,242 test tawh atangin Covid-19 positive 8 an awm tawh a, positivity rate 0.19% a ni tih tarlan a ni a. Khawzawla veng 10 (sawm) ah veng 8 (pariat) test zawh tawh niin, test hmabak pahnihte chu ni 07.09.2021 ah test tura ruahmanna siam a nih thu tarlan a ni bawk.

Mass testing hi District chhung khaw dangah pawh a tul ang zela kalpui tura ruahmanna siam mek zel a ni a. Deputy Chief Minister Pu Tawnluia, bialtu MLA ni bawk hmalakna zarah Mass testing tana pawimawh tak Test Kit pawh Khawzawl District tan hian 7,000 (sangsarih) lai a remchang thei dawn tih meeting-ah hian tarlan a ni bawk.

Vawiina meeting-ah hian Pu C.C. Lalchhuangkima chuan Police Department hnenah Chief Minister’s Relief Fund atanga lei Covid-19 dona hmanrua chi hrang hrang – facemask, gloves, hand sanitizer, LED etc. te a hlan a, heng bungruate hi Pu Lalringliana, Additional Superintendent of Police, Khawzawl District chuan SP aiawhin a dawng a ni. 

Meeting-ah hian DDMA, Khawzawl District member-te bakah DC office-a officer te, District Education Officer, Khawzawl Town VLTF aiawh te leh Khawzawl Sub-Headquarters YMA President te an tel a ni. 

Written by H. Lalramenga, SDC, Khawzawl District