Khawzawl, the 29th November, 2022: Vawiin chawhma dar 11:00 khan Khawzawl DC Conference Hall-ah bawlhhlawh sakhat sawngbawl dan inzirtirna 'Solid Waste Management Training' chu Khawzawl khawpui chhung VC te tan neih a ni.  

District Bawrhsap Pu C.C. Lalchhuangkima chuan kumin chhungin BDO Khawzawl  hmalaknain Khawzawl town area bika hmun 700 chuang zetah hnawm sawngbawlna khur compost pit siam anih tawh thu a sawi a. Heng tawihthei bawlhhlawh paihna hmunte hi tha taka enkawl tur chuan bawlhhlawhte leithaah kan chantir zel a ngai dawn a, bawlhhlawhte chu thil tangkai leh hlu zawk 'waste to wealth-ah' kan chantir thei zel dawn a, thil hlu tak kan nei thei dawn a ni, a ti a. Khawzawlah leitha indaihlohna a nasa em em a, chumi ti ziaawm tur chuan a tangkai hle dawn a ni, a ti bawk.

He hunah Khawzawl town area chhung atangin VC member an kal kim hle a. Pi R. Vanlalduati, SMS (Soil Science), KVK Khawzawl District-in kalkhawmte hi training a pe a. VC-te hian an veng mipuite hnenah training hi an pe chhawng ve leh dawn a ni.