Khawzawl, 11th April 2024:  Vawiin tlai khan Khawzawl Tuisenphai NH-06-a District Check Gate chu Khawzawl Bawrhsap Pu K.  Lalrohlua chuan a tlawh a. He Check Gate hi Covid hripui len hun laia khawtlang leh sawrkar department hrang hrang ten Khawzawl DC kaihhruaina hnuaia an siam a ni a, Khawzawl District Executive Force (SP Office) ten an enkawl zui ta a ni.

Vawiin khan Khawzawl SP Pu Lalchhuanthanga ngenna angin Check Gate-ah hian CCTV dah (install) fel a ni a, dah anih ni vekah hian Bawrhsap Pu K. Lalrohlua chuan a enfiah nghal a ni. Bawrhsap hian Lok Sabha Inthlanpui puala Check Gate-a CCTV dah chu a hnu zelah pawh a tangkai hle dawn a ni, a ti a. Tin, Check Gate-a CCTV dah a nih theih nana hma latu Khawzawl SP Pu Lalchhuanthanga chungah pawh lawmthu sawiin, Police Department zawkin CCTV dah tura an rawn ngen hi a ropui hle a ni, a ti. Police te chu CCTV chu tangkai taka hmang tura duhsakna hlanin, ram dan zawm lote chunga hma lakna atan tangkai taka an hman a duh thu a sawi bawk a ni.