Khawzawl, 18th August 2023: Systematic Voters' Education and Electoral Participation (SVEEP) hmalakna peng pakhat atan vawiin khan Khawzawl Higher Secondary School-ah Awareness Programme neih a ni.

Khawzawl Bawrhsap, District Election Officer (DEO) ni bawk Pu K. Lalrohlua chuan he hunah hian thu sawiin vote thlak chu khua leh tui tha te mawhphurhna a ni, a ti a. DC chuan kum 2018 MLA General Election-ah 22 Tuichang (ST) Assembly Constituency-a vote tla chu Mizoram puma vote tla chawhrual (state average) aia a tlem thu tarlangin, kumin inthlanpui ah chuan vote tla a tam theih nan thalaite - a bik takin a vawikhatna atana vote thlak tur ‘first time voters’ ten tihtur pawimawh tak an nei tih a sawi a. Zirlaite chu lehkha tha taka zira, ram leh hnam tana an thiamnate hmang turin a chah nghal.

Awareness Programme-ah hian Khawzawl Electoral Registration Officer (ERO) Pu Vabeimozachhi Chozah leh Assistant ERO Pu Elijah LH Sanga ten zirlai kalkhawmte chu Electoral Roll-a inziahluh dan bakah Voter-te mawhphurhna zirtirna hun an hmang a. District SVEEP Nodal Officer Pu Timothy R. Lalhmangaiha chuan EVM hnathawh dan hrilhfiahna hun a hman bakah a kaihhruainain zirlaite hian ‘Voter’s Pledge’ an sawi rual bawk.

He hun hi Khawzawl HSS Electoral Literacy Club Nodal Officer Pu Zarzokima chuan a kaihruai a. Khawzawl HSS zirlai October ni 1, 2023 a kum 18 tling chin te chu Khawzawl DC Election Branch ten ‘on the spot online registration’  an tih sak nghal bawk a ni.