Khawzawl, the 7^th April, 2022:

Vawiin khan Office of District Election Officer, Khawzawl District leh NSS, Khawzawl Higher Secondary School Unit buatsaihin Khawzawl HSS ah Election chungchang inzirtirna, “Electoral Literacy Awareness Campaign” neih a ni a, Electoral Literacy Club (ELC) din nghal a ni bawk. He hun hi Pu Lalvenhima, Additional Deputy Commissioner, Khawzawl District chuan Khuallian niin a hmanpui a ni. 

Awareness Campaign hawnna hun Pu H. Lalramenga, Election Officer kaihhruaiah Khuallian Pu Lalvenhima chuan thu sawiin, voter ten Election leh a kaihhnawih chungchang an hriat tam a, “Electoral Literate” kan tam chuan Electoral Roll a inziaklut an tam bakah kan aiawha roreltu thlanna ah pawh kan tel tam zawk dawn a ni, a ti a. Khawzawl District-ah Electoral Literacy a san zel thrih nan Awareness Campaign chu uluk taka ngaihthla a, hlawkthlak taka hmang tur leh midangte pawh hrilhchhawng ve zel turin zirlaite chu a sawm a. Sawrkar leh mipui kan tanrual tlat chuan Khawzawl District chu inthlan felfaina leh vote tlak thatna District ah kan siam thei a ni, a ti bawk.

Additional DC chuan sawi chhunzawmin, zirlaite chu pass tur ngawr ngawr ringawt a lehkha zir lo a, an thil zir thiam bel thin turin a chah a. Eng hna pawh thawk dawn se mahni a inhai kaw thei turin, an zirnaah “quality education” paw chhuak ngei tura thahnemngai taka tan la theuh turin a chah a ni. Campaign hawnna hunah hian Pu Joseph Zonunmawia, Principal, Khawzawl HSS in kalkhawmte lawmna thu sawiin Pu Kamdingliana, Lecturer & NSS Programme Officer in lawmthu a sawi.

Pu H. Lalramenga, Election Officer in Powerpoint Presentation hmangin Khawzawl District a SVEEP activity buatsaih tawh te a entir a. Zirlaite chu vote nei thei rual an nih hunah Electoral Roll a inziaklut theuh tur leh, voter rinawm leh thil chik mi, ngaihtuahna fim tak hmang chunga vote thlak thin ni turin a sawm nghal bawk. Pu Lalrinawma Kholhring, Data Entry Operator, DEO’s Office in Khawzawl Election Office hnathawh kalphung leh hmalak tawhna tlangpui te a tarlang a. Nl. Lalruatsangi, Govt. Khawzawl College ELC Secretary chuan ELC awmzia sawihfiahin College-a ELC hmalak tawh dan report a pe bawk. 

Vawiina Khawzawl HSS a Election chungchang inzirtirna hunah hian zirlaite tan Election kaihhnawihah Quiz leh Debate hmangin intihsiakna siam a ni a. Quiz hi Pu Lalrammawia, LDC, DEO’s Office in kaihhruaiin India leh Mizoram huam chhunga Election kaihhnawih hriatna tizau thei zawhna hrang hrang hmangin inelna hi siam a ni. Debate hi Pi Lalhminghlui, Lecturer, Khawzawl HSS in kaihruaiin “Ram siamthatna turin voter te hi an pawimawh ber a ni” tih thupui hmangin zirlaite an inel a. Debate a tel zingah PC Lalringzuala, Class XII zirlai chu pakhatna a thlan niin, pahnihnaah Lalfakawmi, Class XII leh pathumnaah Hmangaihzuali Cherput, Class XII te thlan an ni bawk.

Awareness Campaign neih zawhah Electoral Literacy Club a inziahluhna hun hman niin zirlai mi 126 an inziaklut nghal a. Nodal Officer kaihhruaina hnuaiah member te atangin Executive Committee an inthlang leh dawn a ni. 

Written by H. Lalramenga, SDC/EO, Khawzawl District