Khawzawl the 9^th July, 2021 

                        District Rural Development Agency (DRDA), Khawzawl District hnuaia Centrally Sponsored Schemes (CSS) hrang hrang kalpui a nih dan thlirletna, First Quarter Review Meeting chu vawiin khan Pu Zothanmawia, Deputy Commissioner, Khawzawl District kaihruaiin DC Conference Hall ah neih a ni.

                        Khawzawl District Bawrhsap chuan thu sawiin, Khawzawl District chu enkawl nuam tawka lian niin, inkalpawhna leh inbiakpawhna pawh a tha a, chuvangin Centrally Sponsored Schemes ten tehna hrang hrang an neih ah pawh Mizoram a District 11 zingah a titha ber nih tum ngei turin DRDA Khawzawl District hnuaia thawktute a fuih a ni

                        Vawiina meeting hi April ni 1, 2021 a DRDA, Khawzawl District din anih atanga Quarterly Review Meeting neih hmasak ber a ni a. CSS hrang hrang heng - Mahatma Gandhi National Rural Employment Guarantee Act (MGNREGA), Pradhan Mantri Awaas Yojana-Grameen (PMAY-G), Mizoram State Rural Livelihood Mission (MzSRLM), Shyam Prasad Murkherjee Rurban Mission (SPMRM) leh Integrated Watershed Management Programme (IWMP) hnuaia Khawzawl District a sawrkar hmalakna te chu a hnuai a mi ang hian thlirho a ni. 

                        Mahatma Gandhi NREGA hnuaiah Khawzawl District ah Job card nei chhungkaw 8441 awm mekin, Job card leh Aadhaar thlunzawm tawh hi 7997 a tling a, hei hi za zelah 94.74 a tling a ni. Aadhaar leh Job card la thlunzawm loh te hi DC, Khawzawl hnuaia Aadhaar Operators te nen tanghoin September, 2021 ral hma a Aadhaar number siamsak a thlunzawm hman vek tura hmalak nise tih a ni.  

Kum 2021-2022 financial year ah Mahatma Gandhi NREGA hnuaiah Job Card holder te tan ni 34 inhlawhna (April - 14 days, May – 14 days, June – 6 days) siamsak tawh a ni a, heng mipui inhlawhna atan hian hna 353 thawh tawh niin Job card holder te hlawh ₹6,68,57,486/- (Cheng vaibelchhe ruk, nuai sawmruk pariat, sing nga sangsarih zali sawmriat paruk) hi an bank account ah e-FMS hmanga thun sak vek an ni. Meeting ah hian Mahatma Gandhi NREGA hnuaia Job Card holder te hlawh hi za ah za a hun takah an account ah thun vek a ni tih tarlan a ni a, July 2021 hian ni 6 inhlawhna siam leh tum mek a ni tih meeting ah hian tarlan a ni bawk.

                        “Jal Shakti Abhiyan Catch the Rain” campaign kal mekah ruahtui khawlna tur leh tuihna humhalhna lam hawi hna chi hrang hrang 49 thawh tawh a ni a. Khawzawl District chhunga tuihna awmna hmun (water bodies) te chu GIS hmanga mapping tih zawh tawh a ni. District huamchhung khaw pariat heng Biate, Chawngtlai, Tualte, Neihdawn, Rabung, Khualen, Sialhawk leh Arro ah te Geographical Information System (GIS) hmanga plan siam fel tawh niin GIS plan ang zela hna thawh mek a nib awk. Khawzawl District chhunga khua zawng zawng te December 2021 hmaa GIS hmanga plan siam hman vek tum a ni.             

                        Pradhan Mantri Awaas Yojana-Grameen (PMAY-G) hnuaiah Khawzawl District-a mi 52 chuan insak tanpuina dawngin, heng mite hian in pawh an sa zo vek tawh a, mi pakhat chauhin final installment a la dawng lo a ni. Sawrkar laipuiin insak tanpuina dawng thar tur Awaas+ software kaltlanga a rawn pek leh turah Khawzawl District ah mi 357 an awm tur thu tarlan a ni bawk.

                        Mizoram State Rural Livelihood Mission (MzSRLM) hi Khawzawl District chhunga khaw 25 ah kalpui mek a ni a. MzSRLM hnuaiah hian Self Help Group (SHG) 364 awmin member zawng zawng zat hi 3085 a ni. SHG te hi Village Organisation (VO) 25 ah an in thlungkhawm tih tarlan a ni bawk.

Khawzawl District-a SHG 348 te hnenah revolving fund pek tawh zawng zawng hi ₹50,80,000/- a tling tawh a. Tin, SHG 300 te hnenah Community Investment Fund (CIF) ₹3,30,00,000/- pek a ni tawh bawk. SHG te hian Covid-19 dona atan hmaituamna 4000 thuiin an sem chhuah tawh bakah damdawiin leh VLTF te hman tur PPE 60 an siam sak bawk a ni. MzSRLM hnuaiah hian financial inclusion pawh nasa taka kalpui mek niin, tun dinhmunah Banking Correspondent “Sakhi” mi 17 an awm a, loan pek chhuah tawh zat hi ₹244.6 lakhs a tling tawh a ni.

                        Shyam Prasad Murkherjee Rurban Mission (SPMRM) ah hian Khawzawl Rurban Cluster hnuaiah khaw sawmpathum heng Arro,   Hmuncheng,    Tualpui,   Ngaizawl, Neihdawn, Khualen, Tuipui, Tualte, Chawngtlai, Vankal, Puilo, Chhawrtui leh Kawlkulh te an awm a. SPMRM hnuaiah hian kumin chhungin State sawrkar atangin 3^rd installment ah ₹139.22 lakhs leh 4^th installment ah ₹56.3 lakhs hmuh a ni tawh a, hemi hmang hian hna hrang hrang heng market shed, agriculture link road, solar street light, water tanky, retaining wall, side drain, etc. te chu Central schemes dang te nen tangrual (convergence) a thawh a ni.

                        IWMP hnuaiah Champhai III Project chu kum 2011-12 atanga thawh tan a ni a. Project Area hi 5000 Hectare lai niin, project cost hi ₹700 lakhs a ni bawk. He project hnuaia Watershed area hian khaw panga heng Khawzawl, Ngaizawl, Neihdawn, Tuipui leh Tualpui te hi a huam a ni. Tun dinhmunah he project hi thawh zawh tawh niin, hun reilote chhunga tihtawp tura ruahman mek a nih thu tarlan a ni bawk.

                        Meeting ah hian Pu Lalrohlua, Project Director, DRDA leh Dr. Saithangpuia, Block Development Officer, Khawzawl RD Block te bakah DRDA leh RD Block atanga Officer leh staff te an tel a ni.