Khawzawl, the 19th April, 2021:

District Rural Development Agency (DRDA), Khawzawl District buatsaihin April ni 19, 2021 zing dar 6.30 khan Khawzawl ah “Jal Shakti Abhiyan Catch the Rain Campaign” rally neih a ni.

 

He Rally bul tanna inkhawm tawi ah hian Pu Lalzakhama, Executive Engineer, PHE Khawzawl WATSAN Division chuan thu sawiin Khawzawl District ah kumin thal laia khaw tin deuh thaw in tui harsatna kan tawk a, gravity hmanga tui lakna hnar te a kang chat nasa in tui hnianghnar zawk nei tura beihpui thlak a pawimawh hle tih a sawi.



 Catch the Rain Campaign a Khuallian District Bawrhsap Pu Zothanmawia chuan he campaign denchhen hian kumin chhunga Mahatma Gandhi NREGA hnuaia khawtin in hna kan thawh turah ruah tui khawl khawmna lam hawi hna te uar zawka thawh theuh a pawimawh tak zet tih a sawi a, tin, kan tuihnar ah tui a tam lehzual theih nan thingphun uar a pawimawh hle tih a sawi bawk.

 

Bawrhsap chuan Khawzawl Zaingen Veng a Taidawnkawn ah rally hi a vai liam a, he rally ah hian DRDA, PHE leh BDO lama thawktute bakah   Khawzawl Town a Village Employment Council member te an tel a, Khawzawl Vengthar thleng banner leh placard kengin an kal a, rally tawpna ah hian Pu Lalrohlua, Project Director, DRDA in lawmthu sawiin rally hi an tin a ni.


 

District Headquarters a Catch the Rain rally neih rual hian Kawlkulh leh Chawngtlai khua a Mizoram State Rural Livelihood Mission hnuaia Self Help Group in tel khawm Village Organisation te pawhin rally hi an lo nei ve a ni.

 

Catch the Rain campaign hian a tum ber chu India ram chhunga thingtlang leh khawpui zawng zawngah ruahtui khawlkhawm leh tuihna tipung tura hmalakna tlo leh tha neih dan kawng zawn a ni a.

 

Jal Shakti Abhiyan - Catch the Rain Campaign, 2021 hi March 22, 2021 atanga November ni 30, 2021 Monsoon thlen hma leh thlen lai denchhenin India ram a district 729 ah neih tur a ni a, he campaign theme chu “Ruahtui tlakna hmunah, a tlak laiin ruahtui khawlkhawm rawh” tih a ni. Prime Minister zahawm takin World Water Day March ni 22 khan he campaign hawnna hun hi a nei tawh bawk a ni.