Khawzawl, dated 16th December 2025: Vawiin chawhma dar 11:00 khan DC Office Chamber-ah District Water & Sanitation Mission (DWSM) meeting neih a ni a, Deputy Commissioner Pu K. Vanlalthiana, Chairman, District Water Sanitation Mission (DWSM) chuan a kaihruai.

DWSM thutkhawmah hian Member Secretary Er. Liantluanga Chohte, Sr. Executive Engineeer, PHED Khawzawl WATSAN Division chuan District chhunga khawpui leh thingtlang khaw hrang hrang tui dinhmun a report a, Khawzawl District chhung thingtlang in tinah Tui Connection pek an ni tawh a, Har Ghar Jal District a nih thu sawiin, Solar hmanga tui pump khaw 17-ah hman mek a ni a, khaw pakhatah buaipui mek a ni bawk tih a sawi. Tuihna humhalh chungchang a hmalak nasat a tul thu te, District chhung a lei verhna hmanga tui lachhuak tawh dilna luh dan te leh faina lam a hmalakna te report a pe bawk a ni. Mizoram Source Finding Committee ten khaw hrang hrang tuilak hnar an lo pawm tawh chu DWSM hian a pawmpui nghal bawk.

Deputy Commissioner Pu K Vanlalthiana, Chairman, DWSM chuan member te chu tuihna humhalh kawnga hmalak ho a pawimawh zia a sawi a, tui pawimawh zia leh thangtharte hmakhua ngaih a pawimawhzia sawiin, mipui te pawhin tui renchem kan uar deuh deuh a tul thu a sawi bawk. Chairman chuan memberte hnenah meeting an ngaihpawimawh avangin lawmthu a sawi a, tui leh thianghlimna kawngah mahni hmazawna hma nasa zawka la zel turin a sawm bawk.