Dated Khawzawl, the 14th December, 2020:

Kar kalta Zirtawpni (December 11th, 2020) chawhnu dar 1:00 khan Khawzawl District Task Force on Covid-19 Vaccination chu an chairman Pu Zothanmawia, Deputy Commissioner hoin DC’s Conference Hall, Khawzawlah an thukhawm. 

Pu Zothanmawia chuan Covid-19 vaccine in Mizoram a lo thlen huna pekchhuah dan tur te, thawktu hrang hrangte chanvo leh mawhphurhna insem dan tur te lo ngaihtuah a, ruahmanna siam a pawimawh tih a sawi a. Covid-19 hrileng dona kawngah tanrual a ngai tih sawiin, Covid-19 vaccination chungchanga hmalakna pawh District level, Block level leh PHC level thlengin inpawh leh tangrual taka kalpui a pawimawh hle a ni a ti. 

Dr. Albert Lalhminghlua, Medical Officer, District Immunization Officer incharge ni bawkin Powerpoint Presentation hmangin Covid-19 vaccine chungchanga hriattur pawimawh chi hrang hrang – Vaccine pekna hmun siam/ruahman dan, a pechhuaktu tur team, vaccine vawnthat dan tur leh a dawn hmasak indawt dan tur ruahmanna awmte a tarlang a ni.

Ruahmanna awmsa anga Covid-19 vaccine dawng hmasa tura thlanchhuahte list chu Khawzawl District-a department thenkhatin an thehluh tawh a. Thehluh tawhte bak midang, vaccine dawng hmasa tur ni a ngaihte sawiho niin, Mizoram sawrkarin hemi chungchanga thuchiang zawk a tihchhuah huna meeting koh a, ngaihtuah chhunzawm leh tura rel a ni.

Written by H. Lalramenga, SDC, Khawzawl District