Khawzawl, 13th February 2024: Nimin khan Khawzawl DC Meeting Hall-ah Khawzawl District Sponsorship & Approval Committee chu Addl DC Pu Lalfakzuala hovin an thu khawm a. Mission Vatsalya hnuaia naupang tanpuina dawng tura chhawpchhuah te chu ngun takin an ngaihtuah a, mi 115 te dilna chu an pawm pui (approve) a ni.

He hunah hian Khawzawl District Child Protection Officer, Pi Lalsiammawi leh Protection Officer (IC) Pu Eddie Vanlalrema te chuan District Child Protection Unit te hnathawh dan tlangpui leh Mission Vatsalya chungchang inhrilhhriatna hun an hmang a. Meeting hian kum 2023-24 chhunga tanpuina (sponsorship) dawng turin naupang 115 te dilna chu a pawm pui a, District chhunga naupang tanpuina mamawh ten awlsam leh chak zawka tanpuina an hmuh theih nan mumal zawka Village Level leh Block Level Child Protection Committee tuai thar te an rel bawk a ni.

Juvenile Justice (Care and Protection of Children) Act, 2022 chuan a tul tawp khawkah loh chuan naupangte hi Child Care Institution-ah dah loh tur an ni, a ti a. Hemi bawhzui zel nan hian Mission Vatsalya hnuaiah naupang harsa zawk te chu an ei leh in, hriselna leh zirna senso chhawmdawl nan thla tin cheng 4000 a tanpui thin an ni a. Heng tanpuina leh chhawmdawlna te hi Approval Committee in an pawm pui (approve) hnuah chauh pek thin a ni. He scheme hnuaia tanpuina dawng thei naupang thlanna tehfung chu:

1. Naupang enkawltu ber a nu hi pasal sun emaw then emaw a chhungten an tuithlar emaw a nihin.

2. Naupang fahrah a ni emaw, chhungkhat hnaivai ten an chenpui te.

3. Naupang nu leh pa te natna khirhkhan vei an nihin.

4. Naupang nu leh pa ten retheihna vang emaw harsatna bik riau emaw avanga an enkawl theih lohin.

5. Naupang a bik taka venhim ngai eg:- chhiatna vangte, tih luihna a hnathawh tirte,nupui pasal neih luihtirte,tlanbo te, HIV(AIDS) vei te,rualbanlote,kutdawh leh chenna hmun neilo te leh tih duhdah tuar te.

6.      PM Cares scheme hnuaia awm te. (Covid vanga nu leh pa chan te)