Khawzawl, the 17th June, 2021:
Vawiin chawhnu dar 2:00 khan Khawzawl District Skill Development Committee chu an chairman Pu Zothanmawia, Deputy Commissioner, Khawzawl District hovin DC Conference Hall-ah an thukhawm a, Mizoram Youth Commission hnuaia Vawk vulh (Piggery Farming) leh Cement Mistiri (Mason Concrete) training kalpui dan tur an rel.
Vawiina meeting-ah hian MYC hnuaia “Livelihood Generation for returned migrant workers due to Covid-19” project-a Khawzawl District tana training programme thlan sa pahnih – vawk vulh leh cement mistiri – te tan a nih theih nana hmalak ngai te sawiho a ni a. Pu H. Lalramenga, Sub Deputy Commissioner hnen atangin Training chungchanga hriattur pawimawh leh hmalak tawhna te ngaihthlak niin, training hun chhung leh training na tur hmun bakah diltu awm tawh zat te, training turte tana hamthatna awm thei hrang hrangte tarlan a ni a. Vawk vulh training chu AH &Vety Department, Khawzawl nen thawk ho a neih tur a nih thu leh, Cement Mistiri training chu SIRD&PR, Aizawl in an pe dawn tih tarlan a ni bawk.
Meeting-ah hian training diltu list thlirho niin, an zing atanga training tur thlan chungchang sawiho zui a ni a. Covid-19 hrileng vangin tum lawk leh beisei hunah training tan theih a ni lo a, sawrkar in inkaihhruaina a siamte ngaichang chungin tan hun tur chu ngaihtuah nawn leh nise tih a ni bawk.
Written by H. Lalramenga, SDC, Khawzawl District
