Khawzawl, the 18^th December, 2020:

Vawiin chawhnu dar 2:00 khan Khawzawl District Skill Committee (DSC) chu an Chairman Pu Zothanmawia, Deputy Commissioner, Khawzawl District hovin an thukhawm. Vawiina meeting hi Labour Employment, Skill Development and Entrepreneurship (LESDE) department hnuaia Pradhan Mantri Kaushal Vikas Yojana (PMKVY) 3.0 kalpui dan tur chungchang, December ni 10, 2020 a Video Conferencing kaltlanga meeting neih tawh bawhzuina a ni.

Meeting kaihhruaitu Pu Zothanmawia chuan PMKVY hnuaia training thlan theih hrang hrang zingah Khawzawl District mamawhna leh thalaite theihna ngaihtuah chunga thlan a pawimawh tih a sawi a. Pu H. Lalramenga, SDC in PMKVY 3.0 chungchang sawifiahin, District Skill Committee chu PMKVY hnuaia District mipuite training na tur (job role) thlang kawnga mawhphurtu a nih bakah, an training chhung leh training zawh, hna an zawn thlenga enzuitu pawimawh tak a ni tih a tarlang. 

Hemi hnu hian DSC member-te chuan Training na tur thlan theih hrang hrang zing atangin Khawzawl District in a mamawh leh, mipui tana tangkai tur ni a hriatte sawiho in an thlangchhuak zui a ni. 

Written by H. Lalramenga, SDC, Khawzawl District