Khawzawl the 24th June, 2024: Vawiin khan Khawzawl District Narco Coordination Center (NCORD) chu an Chairman, Khawzawl Bawrhsap Pu K. Lalrohlua hovin an thu khawm a. Ruihhlo tirem tura NCORD hmalak tawhna hrang hrang te an thlir ho a, hmalak zel dan tur te an sawi ho bawk a ni.

Pu K. Lalrohlua chuan he hunah hian Khawzawl District chu ramri (International Border) hrula awm a nih angin, ruihhlo tawlh rukna kalkawng a nihna chen a awm a ni, a ti a. Hei vang hian Khawzawl District chhungah ruihtheihthil a hluar phah ni a a hriat thu a sawi bawk. Bawrhsap hian ruihhlo la ti ve lo te venhim chu ngaih pawimawh hmasakah neih a ngai tih sawiin; sawrkar, khawtlang, kohhran leh tlawmngai pawl te chu an thlen chin theuhah ruihhlo tih chhin loh pawimawh zia uar taka zirtir zel turin a ngen nghal a ni.

He hunah hian Lalruatzuala Renthlei, Outreach Worker, Cod, Nerc hnen atangin May ni 6 leh vawiin June ni 24 inkara NCORD hmalakna report ngaihthlak  niin, hemi hun chhung hian Vanchengpuiah leh Chalrangahte zirnaninah Ruihhlo Do Awareness  neih niin, tun thla June 27TH 2024 vek hian Khawzawl, Zaingen YMA Hall-ah zirlai High School chun chunglamte tan Ruihhlo Do Awareness Campaign neih leh tum a ni bawk.

Vawiin meeting-ah hian International day against Drug Abuse and Illicit Trafficking June ni 26,2024 Khawzawl a hman dan tur chungchang rel nghal a ni. Hemi ni denchhen hian Khawzawl a home pahnih Chhanchhuahna Home leh Grace Camping Centre te chu tlawh tura rel niin, hemi ni vek hian DC Auditorium-ah programme buatsaih tum a ni.

NCORD meeting hi thla tin neih thin a ni a, hmalaknate hi Narcotics Control Bureau (NCB) lamah report zel thin a ni. Vawiin meeting-ah hian Khawzawl District Hospital aiawh, District Child Protection Office aiawh, Education aiawh leh tlawmngai pawl hruaitute an tel a ni.