Khawzawl, 6th June 2024:  Vawiin khan Khawzawl DC Meeting Hall-ah FOCUS, DMU Khawzawl - District Level Coordination Committee (DLCC) thut khawm neih a ni a. Kum 2023-24 chhunga FOCUS hmalakna leh hmachhawp hrang hrang te thlirhona neih a ni.

Vawiin thutkhawm hi Khawzawl FOCUS-DMU District Project Co-ordination Committee Chairman, Khawzawl Bawrhsap Pu K. Lalrohlua chuan a kaihruai a.FOCUS hnuaiah kuthnathawktuten hmasawnna nasa tak an hmu chu lawmawm a tih thu a sawi a, Line Department- te nena an thawhhona pawh a tha hle a ni, a ti. FOCUS thawktute chu an hnuaia hamthatnate zau zawka sem rual a, kuthnathawktute hlim taka dawngsawng thin turin a chah a ni.

He hunah hian Pu Vanlalruata, District Agriculture Officer, FOCUS District Project Manager ni bawk chuan kum 2023-24 chhunga FOCUS hmalakna hrang hrang te a tarlang a. Line Department pali - Agriculture, Horticulture, Soil leh AH & Vety hnuaiah chhungkua 2700 chuang tanpui an ni tawh a. FOCUS Innovation Fund hmangin Tualte Tomato Processing Plant leh Sialhawk Pineapple Processing Plant te din an ni tawh bawk. April 2024- March 2023 chhungin FOCUS-DMU Khawzawl hian kuthnathawktute enkawl nan cheng nuai 592.62 (₹5,92,62,868.30) an hmang a. He mi hun chhung vek hian FOCUS enkawl kuthnathawktute hian thlai chi hrang 11 an thar chhuah atangin cheng nuai 534.25 (₹5,34,25,540) an la lut tih tarlan a ni.

Vawiin thut khawmah hian FOCUS a thawktute, Line Department aiawhte, Khawzawl KVK aiawh, Rural Development aiawh (DRDO leh BDO), Settlement Officer aiawh te bakah Farmer Interest Group aiawhte an tel a ni.