Khawzawl, the 15^th October, 2021 

Khawzawl District tana District Development Coordination and Monitoring Committee (DISHA) meeting hmasa ber chu video conferencing hmangin October ni 14, 2021 (11.00 AM) khan Pu C. Lalrosanga, MP (Lok Sabha) kaihhruaina hnuaiah neih a ni.

Chairman Pu C. Lalrosanga chuan Khawzawl District tana Ministry of Rural Development hnuaia hmasawnna hna thawh hrang hrang te thlirhona DISHA meeting tum khatna neih theih ani chu lawmawm a tih thu a sawi a, District headquarters ah ngei DISHA meeting neih a duh hle rualin Covid19 hripui len lai anih vangin meeting chu video conferencing hmanga buatsaih anih tak thu a sawi a. DISHA hi mipui thlan hruaitute (elected representatives) leh sawrkar hnathawk te’n tha zawka hmasawnna hna an thawhho theihna tura forum pawimawh tak niin District hmasawnna atana hmang tangkai turin Chairman chuan member tin te a chah a. Khawzawl District hi District din thar anih piah lamah Mizoram hmun pawimawh lai taka awm anih avangin DISHA meeting hmanga hmasawnna hnathawh hrang hrang thlirho hi a pawimawh lehzual a ni tiin Chairman chuan a sawi.

Meeting a tarlan anih dan in kum 2021-22 1^st leh 2^nd quarter chhungin DRDA, Khawzawl District hnuaia khaw 38 ah Mahatma Gandhi NREGA hmangin job card neitu chhungkaw 8472 te hnenah hna chi hrang hrang 601 hmangin ni 58 inhlawhna siam sak tawh a ni a, mipui inhlawhna pawisa ₹1138.26 lakhs chu job card neitute bank account ah thun tawh a ni. Kumin financial year kal mekah hian ni 100 inhlawhtlin ngei tum a ni. Mahatma Gandhi NREGA leh Central Schemes dang heng Jal Jeevan Mission, Jal Shakti Abhiyan-Catch the Rain Campaign, Shyam Prasad Mukherjee Rurban Mission leh FOCUS project te pawh Khawzawl District ah hian hna hrang hrang ah thawhho (converged) a ni.

Pradhan Mantri Awaas Yojana-Gramin (PMAY-G) hnuaiah Khawzawl District ah in 51 sak zawk tawh a ni a, insak tanpuina dawng tur chhungkaw 719 thlan leh tawh an niin Sawrkar laipui atangin tanpuina pawisa pawh an dawn thuai beisei a ni.

Shyam Prasad Mukherjee Rurban Mission (SPMRM) hmangin Khawzawl Rurban Cluster a khaw 13 te tan hmasawnna hna hrang hrang Centrally Sponsored Schemes dang te leh Critical Gap Funding hmangin thawh mek a ni bawk a, kum 2021-22 chhung hian hna kal lai mek chi hrang hrang heng agriculture link road, solar street light, playground laih, tomato chin, Village Organisation in sak, internal road siam leh a dang te thawh mek a ni.

Mizoram State Rural Livelihood Mission (MzSRLM) hnuaiah kum 2021-22 chhungin Self Help Group (SHG) panga din thar a ni a, SHG 53 te’n hna hrang hrang thawh nan bank loan an la a, SHG member te zing atangin Banking Correspondent (BC) Sakhi ni thei turin mi 16 in examination an pass thar a, tin, September thla chhung khan khaw tin ah Rashtriya Poshan Maah Campaign hman a ni.

Public Works Department hnuaiah Pradhan Mantri Gram Sadak Yojana (PMGSY) kaltlangin khaw hrang hrang inkalpawhna tur 116.01km a thui chu vaibelchhe 105.60 hmangin thawh mek a ni a, heng hna te hi Sawrkar laipui duh dan anga March ni 31, 2022 a thawh zawh vek anih theih nan chak zawka thawh nise tih a ni.

Public Health Engineering Department hnuaiah NABARD loan hmangin khaw hrang hrang 7 ah Water Supply Schemes thawh mek a ni a, tin, Jal Jeevan Mission hnuaiah khaw pahnih Riangtlei leh Lungtan te tan Water Supply Scheme thawh zawh tawh a ni bawk.

Deen Dayal Upadhyay Gram Jyoti Yojana hnuaiah Power & Electricity Department in Khawzawl District chhunga power supply tha zawk pek anih theih nan hna hrang hrang thawh a ni.

Pradhan Mantri Awaas Yojana-Urban (PMAY-U) hnuaiah Khawzawl District a notified town pathum Khawzawl, Khawhai leh Biate atangin insak tanpuina dawng tur chhungkaw 2072 an awm mek thu leh 1^st installment sum hi chhungkaw 896 in an dawn tawh thu meeting ah hian tarlan a ni. Tin, Deendhayal Antyodya Yojana National Urban Livelihood Mission (DAY-NULM) kum 2021-22 chhungin Self Help Group 13 din tawh niin he Scheme hnuaiah hian Shelter for Urban Homeless hi Khawzawl Dinthar vengah sak mek anih thu tarlan a ni bawk.

Prime Minister’s Employment Generation Programme (PMEGP) hnuaiah kum 2021-22 chhungin Khawzawl District tan margin money nuai ₹100 hmanga eizawnna bul tanna tur project hrang hrang 40 atan tanpuina pek tum a ni a, tun dinhmunah project 30 thlan tawh ani bawk.

Khawzawl ICDS Project hnuaiah kum 2021-22 chhung hian vitamin B complex – 5262 bottles, edible oil – 975 litres, calcium tablets – 398 tin, motor channa – 3228kg, chi – 4350kg, biscuit – 4874kg, mung dal – 6749 kg, maida – 2157kg leh chini – 672kg sem chhuah tawh a ni. Pradhan Mantri Matru Vandana Yojana Scheme hnuaiah Khawzawl District a nu nau pawm mi 99 te hnenah tanpuina ₹4,81,000/- pek chhuah tawh ani tih meeting ah tarlan a ni. Tin, Indira Gandhi National Old Age Pension Scheme hnuaiah tar pension mi 750 te hnenah pek mek a ni a, Indira Gandhi National Widow Pension Scheme hnuaiah hmeithai 59 te tanpuina pek mek an niin Indira Gandhi National Disability Pension Scheme hnuaiah disabled pension hi mi 19 te hnenah pek mek an ni bawk.

Irrigation and Water Resources Department pawhin Pradhan Mantri Krishi Sinchayee Yojana (Har Khet ko Pani) hnuaiah minor irrigation project 4 (Bawnzawl MIP, Phaisen Hmar MIP, Tuiphal Phase-II MIP leh Khuangthli MIP) te an kalpui mek a, hei bakah hian Ministry of Jal Shakti hnuaiah Tuisen Ground Water Irrigation Project an kalpui mek bawk.

National Health Mission hnuaiah January-September 2021 chhungin naupiang 271 an awm a, nausen thi 9 awmin Infant Mortality Rate hi 33.5 a ni, nu nauchunga thi erawh an awmlo thung. Damdawiin a nu naunei JSK tanpuina dawng mi 197 an awm a, tin, JSSK tanpuina dawng mi 238 an awm bawk.   National Programme for Control of Blindness hnuaiah school naupang te mit endikna te, a thlawna tarmit pek leh zai te case 872 lai an nei bawk.
 

DISHA meeting ah hian Co-Chairman Pu K. Vanlalvena, MP (Rajya Sabha) bakah Pu L. Thangmawia, MLA, Lengteng Assembly Constituency, Pu C.C. Lalchhuangkima, Deputy Commissioner, Khawzawl District, Pu Lalrohlua, Project Director, DRDA leh DISHA members dang te an tel a ni.