Khawzawl, the 17th January, 2023: Vawiin chawhnu dar 2 khan Khawzawl DC Office tualah District Disaster Management Authority (DDMA) hmalaknain State Disaster Response Fund (SDRF) kaltlanga lei kangthelhna Fire Extinguisher semna hun hman a ni a. He hun hi District Bawrhsap, Pu C.C. Lalchhuangkima, Chairman, District Disaster Management Authority (DDMA) ni bawk chuan hmanpuiin VC hnenah Fire Extinguisher sem chhuah a ni.

District Bawrhsap Pu C.C. Lalchhuangkima chuan kangmei laka inven chu mitin mawhphurhna anih thu leh hemi kawngah hian khawtlang hruaitu VC ten mawhphurhna an neih thu sawiin, khua a lo ro leh tan dawn a, in leh ram kang a awm lohna turin mahni veng leh khua theuhah tan kan lak angai takzet dawn a, tun hi bultannaah i hmang ang u, tiin kalkhawmte a sawm a. Kangmei a chhuah thulhah awmze nei taka hmalak a tul thin thu leh roreltu leh mipui thununtu awm a tul thin thu tarlangin, Village Level Disaster Management Committee-te kutah hna pawimawh tak hi a tla lo thei lo a ni, a ti a. Kalkhawmte chu Fire Extinguisher hman dan inzirtirna chu ngun taka ngaihven tur leh kangthelhna hmanrua sem chhuah chu tul lova hmang lova, mamawh hun taka hman anih theih nana ruahmanna siam theuh turin a chah a. Vantlang himna atana tangkai taka hman anih ngei beiseiin duhsakna a hlan a ni. 

He hun hi Pu James Lalnithanga, SDO (Sadar) chuan kaihruaiin kalkhawmte lawmna thu a sawi a. Pu MS Dawngliana (Nanoa) chuan Fire Extinguisher hman dan a entir bakah dahthateh enkawl dan a zirtir a. Quick Response Team (QRT), Khawzawl DC Office enkawlten rikrum leh chhiatna thlen thulha chhanchhuahhna kalpui dan tur Emergency Rescue Operation an entir a. VC kalkhawmte pawh tihtir chhin niin, hlawkthlak an ti hle a ni. Pu Lalvenhima, Addl. DC in thu a sawi bawk a, Pu Obed Lalmalsawma, SDC in lawmthu sawiin hun hman a khar a ni. 

Fire Extinguisher Kg 4 a rit hi Khawzawl District-a VC awm zawng zawng 38 te hnenah pakhat theuha sem a ni a. Vawiin Fire Extinguisher semna hunah hian VC, MJA leh Quick Response Team, Khawzawlte an tel a ni.