Khawzawl, the 3rd March, 2021: 

Khawzawl District Consultative Committee (DCC)/ District Level Review Committee (DLRC) chu vawiin khan an Chairman Khawzawl District Bawrhsap Pu Zothanmawia hovin DC Conference Hall-ah an thukhawm. He hunah hian  December 31, 2020 thlenga Khawzawl District chhunga Bank hrang hrangte dinhmun leh hmalaknate thlirho a ni.

Pu L. Lawmvela, Lead District Manager (LDM) & Convener, SBI Lead Bank Office Champhai  chuan kalkhawmte lawmna thu a sawi a. December 2020 Quarter tawp thlenga Khawzawl District chhunga Bank hrang hrangte hnathawh leh hmalaknate thlirletna neih a nih bakah hmachhawpte sawiho nghal a ni. 

Meeting-a tarlan a nih danin December 2020 Quarter zawh thlenga Khawzawl District-a Bank hrang  hranga pawisa dahluh zat total deposit chu cheng nuai 13473.46 niin, loan pekchhuah zat chu cheng nuai  7762.34 a ni a. Pawisa dahlut zat atanga loan pek chhuah zat khaikhinna CD Ratio chu 57.61% a ni a, hei hian CD Ratio bituk zat 60 % chu a phak lo deuh a ni.  

Hemi  hun chhunga loan pekchhuah  zat  dinhmun  tlangpui chu hetiang hi a ni;  Agriculture loan cheng nuai 2176.35,  MSME (Sumdawnna) loan cheng nuai 668.97, Education loan cheng nuai  0.86, Housing loan cheng nuai 1425.95, PMEGP loan cheng nuai  59.91 leh CLSS hnuaia PMAY/HFA  loan cheng nuai  209 te a ni. 

Khawzawl District chhungah hian December 2020 tawp thleng khan Bank Branch 7 awmin ATM 3, Business Correspondent 9, Customer Service Point 1 leh Indian Post Payment Bank awmna khua 18 a awm a ni.

Vawiin meeting-ah hian Pu P.C Lalchunglura SP Khawzawl, Pu Ankit Aggarwal RBI Manager, Pu Rabishankar Likmabam, District  Development Manager, NABARD, Line department leh Bank hrang hrang aiawhte an tel a ni.

Written by H. Lalramenga, SDC, Khawzawl District