Khawzawl, 22st June, 2022: Nimin chawhnu khan Khawzawl District chhunga puak thei thil hman phalna (Explosive Licence) neite endik dan turte, dan phal loha puak thei thil leh ralthuam tawlh ruk a awm loh nana hmalak dan turte relin Bawrhsap Pu C.C. Lalchhuangkima hovin DC Conference Hall-ah meeting neih a ni. 

Pu C.C. Lalchhuangkima chuan Union Home Ministry leh Mizoram State Home Department thurawn bawhzuiin puak thei thil hmangtu leh zuarchhuaktu Explosive Licence Holder leh NOC nei ten, dan ang thlapin khuahkhirhna felfai tak hnuaiah an hmang/zuar em tih leh  tawlh ruk awm theite bakah, danin a phut anga hma an lak leh lak loh enfiah tur chungchang rela thutkhawm a nih thu a sawi a. Khawzawl District chu kawngpui pawimawh tak tantlang a nih avangin dan lova puak thei thil kawl leh tawlhruk kawnga hman theih a nih avanga fimkhur a ngaih thu sawiin, dan lova thiltih do kawngah tanrual a tul thu a sawi a ni. 

Meeting chuan Explosive Licence neite endik hna chu a hmalama kalpui nise a ti a. Khawtin VC, YMA Branch leh mipuite chu dan lova thiltih do leh ven kawnga beng chhi reng a, hetiang thil rinhlelh a awm chuan rangtaka dan leh thupek kengkawhtute hnena hriattir vat thin turin a sawm a ni.