Khawzawl 17th. December, 2020 : 

Directorate of Information & Public Relations bultumin Khawzawl District Photographers Society Member te tana ni 2 awh thlalak dan inzirtirna Workshop chu vawiin atangin neih tan a ni a, vawiin chawhma dar 10:00 khan Khawzawl District Bawrhsap Pu Zothanmawia chuan Khawzawl Vengthar BNRGSK Building-ah Workshop hi a hawng a ni.

Khawzawl District Bawrhsap chuan Khawzawl District Photographers Society din a ni chu lawmawm a tih thu leh hei hi Khawzawl District mamawh leh hmasawnna a ni a ti a. Tunlaiah thlalak a eizawng an tam tawh tih sawiin hlawhtlinna nei tur chuan hmingchher a ngai a, mite rin ngam turin rinawmna nunpui a tul a ni a ti a. Miin sum tamtak sengin, dah that turin an hun pawimawh thla an laktirnaah thlalatuten an mawhphurhna sanzia an hriat a, vawikhat tihsual avangin miin an hnawl phah thei tih hre chungin fimkhur tak leh uluk taka thlala thin turin a chah a. Pu Zothanmawia chuan mi thlalak insawisel sak aiin a thalam zawng a infuih a, inchawimawi thiam hi thlalatute tan a phurawm a, a dawngsawngtu tan nasa takin thu pawh a sawi zawk a ni a ti.

Vawiin Workshop hawnna hi KDPS President Pu Lalthianghlima Ralte in a kaihruai a, Pu Lalthianghlima chuan Bialtu MLA, Deputy Chief Minister Pu Tawnluia'n an ngenna ngai pawimawh a Workshop an neih theihna tura hma a lakpuinaah leh Workshop buatsaihsaktu DIPR hotute leh Mizoram Photographers Society hruaitute chungah lawmthu a sawi a ni.

Workshop-ah hian Mizoram Photographers Society atangin Pu Hnamtinkhuma, General Secretary, Pu H. Lalchhanhima, Financial Secretary leh Member 2 - Pu Runremmawia leh Pu Lalsangkima ten Camera hman dan leh thlalak danah zirtirna an pe a. Naktukah Mualvawm Field-ah Practical in thlalak dan inzirtirna hi an nei chhunzawm leh dawn a. Workshop-ah hian Khawzawl leh khaw chhehvel atangin thlala a eizawngte leh thlalak lam tuipui mi 25 vel an tel a ni.

Written by H. Lalramenga, SDC, Khawzawl District