Khawzawl the 14th September, 2021:
Vawiin khan Pu C.C. Lalchhuangkima, Deputy Commissioner, Khawzawl District Khawzawl Mualvawm field-a astro turf phah tura hna thawh mek leh Pavilion tur sak mek te a hmunah kalin a enfiah.
Khawzawl District Bawrhsap chuan hna tha, rintlak leh rotling siam turin hna thawktute a fuih a, an hnathawh lai chu thawh zawh hrim hrim bakah a enkawl zui dan tur uluk taka lo ruahman lawk turin a chah a, field a grass phah piahlamah a chhehvela mipui thutna tur leh motor hunna turte thlengin ngaihtuahna sen a pawimawh tih a sawi a ni. Hnathawktute chu an hnathawhna kawnga harsatna an tawh te a zawt bawk.
Field chhuata phullem phah hna thawktute chuan fur ruahtui tlak lai a nih avangin hna chawlh lai lawk a ni tih leh, hemi chhung hian a theih ang angin ground sira tui paihna chungkhuh hna thawh a ni tih an tarlang a. Khua a that chhoh a, sum leh paiah harsatna a awm loh chuan a hungna (fencing) siam leh artificial grass phah chu thlahnih chhung vela zawh theih an inbeisei thu an sawi a ni.
Khawzawl Mualvawm field siam hna hi UD&PA Department kaltlangin cheng nuai 476 chuang sengin Syncotts International ten an thawk mek a. Mualvawm field zau zawng tur hi meter 109 a sei leh meter 76 a zau tur niin, a hungna tha tak siam a ni dawn bawk a ni.
DC Pu C.C. Lalchhuangkima hian Mualvawm field pavilion sak mek pawh en nghalin, hna an kalpui mek dan leh harsatna an neihte a sawipui a. Pavilion pawh hi UD&PA Department hnuaiah contractor dangin thawkin, cheng nuai 370 chuang hret (Rs. 371,67,171.74/-) sen ralna tur a ni a. A dung metre 29.60, a vang meter 11.90 tur niin, field zawlah gallery pakhatna a awm ang a, hemi chungah hian gallery pakhat a awm bawk. Field zawl hnuai basement I leh basement II ah te hian inthiarna leh inthlakna pindante a awm dawn a ni.
Vawiina Khawzawl DC in Mualvawm Field leh Pavillion hna kal mek a enfiahna hi Pu Lalrohlua, Additional Deputy Commissioner, Pu James Lalnithanga, SDO(Sadar), Pu Ngurthansanga, DUDO, Pu H Lalramenga, SDC te bakah hna thawktu Contractor te leh Technical mi ten an tawiawm a ni.
Written by H. Lalramenga, SDC, Khawzawl District
