Khawzawl, the 2^nd September, 2021:

Vawiin khan Pu C.C. Lalchhuangkima, Deputy Commissioner, Khawzawl District chuan Khawzawl District Headquarters-a Mass Testing neihna hmun leh Covid-19 kaihhnawiha duty te chu a hmunah tlawhin Khawzawl khawpui chhung a fangkual.

Khawzawl District Headquarters hi nizan dar 7:00 atangin Restricted Area-a puan niin, Covid-19 hrileng dinhmun dik tak hriat a nih theih nan vawiin atangin Mass testing neih nghal a ni a. Khawzawl Vengthar atanga tan niin, a tahtawla veng hrang hrang tuamchhuak tura ruahmanna siam a ni. Mass Testing-ah hian vawiinah sample 847 test niin Covid-19 positive hmuhchhuah a la awm lo a ni. 

Khawzawlah hian Covid-19 hrileng darh zel tur venna atana inkhuahkhirhna siamte kengkawhin hmun hrang hrangah VLTF, Executive Duty, YMA leh police te chu vawiin atangin ngawrh lehzualin an duty a. District Bawrhsap Pu C.C. Lalchhuangkima chuan heng hmun hrang hranga duty te hi an duty na hmunah tlawhkualin, Covid-19 dona atana hman turin Khawzawl veng hrang hranga VLTF te hnenah pawisa fai Rs. 2,000 theuh a hlan a ni. Veng hrang hranga duty te tarlan danin mipui pawhin thu an awihin, dan bawhchhia man tur leh duty te tana harsatna siam zawnga khawsa an awm lo a ni. 

Nimin tlai dar 5:00 atanga vawiin tlai dar 5:00 thlengin Khawzawl District-ah Covid-19 positive case 22 (sawmhnih pahnih) hmuhbelh a ni a, tun dinhmunah active case mipa 56 leh hmeichhia 55, an vaiin mi 111 an awm mek. 

Khawzawl District Bawrhsapin Mass Testing neihna hmun leh duty post a tlawhkual hi Pu James Lalnithanga, SDO(Sadar) leh Pu H. Lalramenga, SDC ten an tawiawm a ni. 

Written by H. Lalramenga, SDC, Khawzawl District